又到坐低醫肚的時候！筆直一條廣東道，大小食肆林林總總有成20間，荷包夠照又大堆頭的話，不妨食得豪一點，預早擦番個聖誕大餐；二人世界，要慳慳儉儉睇荷包做人，簡簡單單隊碗艇仔粥又得啫，豐儉由人，自己識揀啦。
食西式聖誕大餐有樣好，上菜收碟換叉派餐巾，頭盤餐湯主菜甜品再嚟咖啡或茶，至少要個半鐘先食得完，以下推介的「派對晚餐」、「平安夜晚餐」，食幾耐坐幾耐唔使趕頭趕命，興起，帶多支酒佐膳，不收開瓶費，啱晒柴娃娃大班人食飯兼吹水。
店名：Mint
地址：尖沙嘴廣東道122至126號地下
電話：27355887
6道頭盤、5道主菜、3道甜品，兼送香檳1支，至少6人Order，每位$208。
右圖：
草原燒羊架（上）
趁熱食，攤凍的羊架散發濃烈羶味，未必人人頂得順。中國人食西餐，唔一定要刀刀叉叉，直接點，手撕羊架往嘴送，咁先夠放。
扒意大利燒烤巨菌
釀芝士煙肉莧菜焗蠔（下）
至怕菜名水蛇春咁長，沒啥好感，一試，不俗，巨菌夠爽、芝士煙肉夠香、蠔夠甜。
頭搭尾6道菜，12月24日推出，每位$388；21日前預訂，每位$328。
右圖：
聖誕提子酥卷（上）
勁有聖誕氣氛，朱古力做聖誕樹再加甜到膩的提子，名副其實的「甜」品。
扒半隻波士頓龍蝦伴法國鱸魚配茴香忌廉香檳汁（下）
龍蝦老早幫你去殼，即食啖啖肉，唔使你煩；鱸魚香煎，蘸帶酒味的香檳汁吃，勁滑。
右圖：
聖誕樹（$34）
青蘋果汁做底，加菠蘿汁、檸檬汁、薄荷汁，再添幾塊薄荷葉作裝飾，味酸甜。
Cecilia：「食西餐先有節日氣氛，同Friend一齊Share十幾道菜，邊食邊談心，咁至夠Warm。」
盡孝心，就今日預先陪老人家慶祝佳節，但帶佢哋食甚麼聖誕西餐，盞無癮收場。上海菜，唔敢話啱晒所有人胃口；「聖誕上海大餐」，巧立名目而已，左拼右砌起個朵咁解啫，但話晒新店開張，全部熱食兼是傳統菜式，老人家會受落。
店名：上海坊
地址：廣東道68至80號恒利商業大廈2樓
電話：31136993
左圖：
蟹粉小籠包（上）
無Check過餡內蟹肉與豬肉的比例，但應該勁多蟹肉與蟹膏，因為勁重蟹味；豬肉不算肥，但咬落多汁，小心燙嘴。
松子桂魚（下）
松子屬貴價貨，鋪滿面，桂魚肉甜，汁夠酸，送飯一流。
左圖：
酸辣魚翅湯（上）
齋望，有點似普通泰式酸辣湯，味道，亦與酸辣湯相差無幾，畢竟多了一抽抽夾得起的魚翅，感覺就好味得多。
火雞絲粉（下）
初想選用火雞肉必嚡口，試味，可能加了大量麻醬的關係，勁香勁滑口。
＊聖誕上海大餐還有以鮮奶煮成的津白加白菜及紅燒獅子頭。
池生：「中國菜食火雞好少有，感覺親切得嚟叫做有啲新鮮感，我會考慮帶一家大細試吓呢個上海聖誕餐。」
聖誕火燄蛋糕、白色Tiramisu（各$15）
唔飽唔餓又口痕痕，整番件Cake當消夜又點睇？斷估都好過你喺街邊拮串五皮魚蛋啩？
店名：元綠壽司
地址：廣東道30號新港中心102號地舖
電話：23170000
聖誕新年雞翅套餐（$78）
屬一人套餐，紅燒帶子雞絲翅配1款上海小菜，另有甜品，陽春麵、白飯或菜飯任擇，話晒都有翅口浪吓口，叫2客都唔使兩嚿水，抵食。
店名：樂翠小廚
地址：廣東道98號地下
電話：23176201
24、25號去食聖誕晚餐又要訂位，又要同人迫，反而Lunch時間可以坐得鬆動些，食物種類又似樣，但係價錢就平一半有多，食完重可以睇埋兩點半電影，日頭過聖誕，另一番感受。
聖誕午餐（$88起）
燒火雞三文魚卷拼香煎鯛魚或美國牛柳配燒火雞三文魚卷
聖誕晚餐（$148起）
煎美國牛柳配竹節大蝦或聖誕特色雜扒
PokkaCafe
地址：廣東道100號地下1號舖
電話：27306886
鮮蝦香脆春卷（$15）、竹笙鮮蝦腸粉（$25）、XO炸醬撈麵（$30）、蟹球帶子艇仔粥（$35）、蠔豉生菜鯪魚球粥（$35），好味兼飽肚，有幫襯即送你聖誕卡1大張，物輕情義重，叫做有啲誠意啦！
店名：榮苑粥麵小廚
地址：廣東道76號地下
電話：23772603
好多聖誕餐的甜品都係求其一杯雪糕就算，要食啲甜到膩嘅甜品就要另找地方。不如去有LiveBand嘅HardRock食個卡路里特低的鮮果乳酪糖餅（$68），份量大、兩個人一齊食都得。
HardRockCafe
地址：廣東道30號新港中心1樓
電話：27370888