距離踏入2003年只剩番11日嘅時間，唔少代理正積極準備來年嘅連串新計劃；當中，亞Mark早前提過話日產會將原有銅鑼灣嘅Showroom，轉落去灣仔經已有定案，新Showroom位置即原有韓國現代汽車陳列室（即灣仔告士打道42-44號捷利中心地下），並會於1月1日開始營業，而開幕日期反而會推遲至1月21日，皆因到時會有特別嘉賓——FairladyZ抵港嘛！相信屆時又會掀起車壇一陣迴響㗎！另外，早前抵港嘅全新Primera車系，代理以唔到15萬嘅價錢作招徠，聽聞外間反應唔錯之餘，銷量亦見持續攀升；有見及此，佢哋正有意將車價調升回原有嘅16萬9千咁話，若然你有興趣擁有一部咁另類又帶有房跑味嘅中型轎車的話，就真係唔好錯過最後機會喇！否則畀足原價就無晒着數啦！