大市反覆，恒指由跌變升，但進帳只得9點。窩輪市場最醒嘅係華能Call輪，有4件打入10大龍虎榜，升幅由8.9%至23.6%，槓桿率愈大嘅，輪價升幅愈大。正股（902）收6.50元，升幅4.8%，帶起晒啲Call輪。
華能Call輪9546同9538，都係明年3月夠鐘，扣埋啲節日假期，大概只有兩個月壽命，溢價分別係8.5%同6.8%，槓桿率係11.8倍同9.8倍。咁嘅數據，唔係好博得過。正股神神化化，基金舞上舞落，唔易捉摸，只要正股牛皮，兩隻輪嘅溢價都會收縮，即係輪價下跌。華能另外兩隻遠期Call輪9401同9231，前者明年9月夠鐘，現價10.5仙，溢價6.6%，槓桿率6.2倍，比較值得諗吓，但最好都係等正股調整時先至入貨。至於隻9231，1年後到期，平水咁滯，弊在冇乜成交同槓桿率3.1倍太細。
成交金額最勁嘅除咗恒指Call輪9552同Put輪9444之外，就輪到和黃Call輪9518，昨有2600萬銀，收33.5仙，冇郁，正股（013）收50元，亦係冇郁。隻輪明年2月24日到期，扣埋聖誕假、新年假同農曆新年假，日子唔多，溢價5.9%，槓桿率14.9倍，留意溢價收縮，炒上落無問題，咪長情揸得太耐。設定個價，例如28仙至35仙，低買高賣。
章盛