樂基兒（Galie）早前進軍日本模特兒界，並在當地培養出畫油畫的興趣，兩個月便畫了十多幅，日前她更只以十五分鐘便完成一幅擁有聖誕樹髮型的聖誕老人畫像，想像力認真豐富。
本地模特兒樂基兒早前進軍日本，在當地逗留兩個月期間，百無聊賴逛百貨公司時買了些顏料，竟無師自通畫油畫。
Galie早前接受訪問時說：「我第一幅畫嘅畫，係喺日本百貨公司買嗰啲專畀初學者畫嘅風景畫，呢啲風景畫有埋outline畀你跟住畫，而且配晒顏色。」
Galie兩個月畫了十二幅畫，但更意外是畫畫讓她結織了不少日本朋友，她說：「我喺日本拍個烏龍茶廣告時，個stylist好好人，佢老公對我又好好，我唔識點多謝佢哋，就畫咗一幅畫送畀佢哋，就係咁做咗朋友，之後佢哋又介紹好多人畀我識。」
是次Galie應本報之邀繪畫一幅以「聖誕老人」為主題的油畫，她思考一下便用鉛筆輕輕勾畫幾筆，然後用油彩、畫筆和油彩條上色，並不時用手指左捽右捽，短短十五分鐘便完成這幅「聖誕老人」畫像。
但Galie掩着嘴笑說：「呢個聖誕老人嘅頭髮係一棵聖誕樹，我唔識畫個身，我由細到大都好鍾意綠色同紫色，所以後面聖誕燈光圈全部都係綠色。」
採訪、攝影：DebbieLum