前晚唔少波友捱更抵夜為咗睇利物浦對維拉場聯賽盃，點知波飛問題搞到場波延遲咗粒幾鐘，令收費台改播皇馬對世界明星隊，事後梗有波友發牢騷啦。其實，呢家嘢無人控制得到，佢哋應變算快，兩位講波佬齋撐咗成八、九十分鐘咁耐，證明有做功課亦抵讚；不過佢哋重可以精益求精。
我前晚就一路睇住網站，一路睇直播，其實係佢哋決定改播表演賽前，應該知道維拉場波會係香港時間凌晨五點零五分開賽；不過都算啦，星光熠熠嘅表演賽都唔錯，因為之前宣傳片話有好多星，有亨利又有奧雲……？咦，但係聽講兩個都無入選，奧雲同時間要幫利物浦踢聯賽盃，唔通識分身……？
巴塞隆拿輸完一場又一場，成隊愁雲慘霧兼醞釀兵變，連日來都有好多招兵傳聞。你估最近傳佢哋想斟邊個？羅馬里奧是也。我求大俠同大家一樣，從來唔敢睇少呢隻老馬，因為佢真係好波；而站響巴塞立場，羅馬里奧自由身唔使錢，又幾化算。如果佢真係重返西甲，我求大俠舉腳贊成。
兩大飛人鍾絲同埋蒙哥馬利自從做咗情侶後，真係只羨鴛鴦，不過，喺星期三佢哋就俾通訊社拍到喺約克大學嘅田徑中心，跟「禁藥飛人」賓莊遜嘅前教練法蘭斯練習。賓莊遜用禁藥，法蘭斯亦俾加拿大田總終身停牌，鍾絲同蒙哥馬利重埋佢嗰度，究竟係佢哋唔知法蘭斯嘅底細上咗賊船，抑或另有內情呢？我求大俠真係要求證一下。
我哋體育版之前話過意大利盃長捧下盤有着數，果然前晚四場意大利盃先開三場下盤。到尾場AC米蘭好生性大勝安科納，救番一啲上盤客。查實AC已派後備軍，但仍有艾比亞迪、凱域、馬田拿臣、李安納度踢正選，咁強後備力量再整多件雷哥斯達比對手歎吓，唔贏有鬼。意大利盃玄機，惟獨唔可以套用響AC身上。
米高佐敦雖然年近四十，但依然同後生個陣時咁好勝。早排呢位波神喺對速龍場波竟然只攞得兩分，結果俾啲輿論同球迷口誅筆伐，話佢年老再冇料到；激到波神喺近兩場波大發神威，連續兩場對實力麻麻嘅鷹隊同灰熊攻入三十多分。我求大俠當然唔敢睇少波神嘅能力，不過問題喺四十歲嘅佢重能唔能夠場場攞成三十幾分呢？
逢周一至周五見報