明年中大夠晒熱鬧，噚晚中大校長金耀基假座恒生總行頂樓博愛堂，宴請傳媒朋友，全部都係中大校友。原來明年中大將踏入四十周年，金校長借機會預告一吓有乜慶祝活動。
八方攞住份活動表睇到眼都花，由年頭到年尾節目排到密密麻麻，頭炮係慈善步行籌款，三月有個全球大學校長論壇，六十幾位答應出席嘅校長，來自牛津、劍橋及清華、北大等。之後重有夏令營、音樂會、中大校慶賽馬盃等好多嘢玩，十月高潮係萬人宴，金校長話，希望所有校友都可以返中大校園眾首一堂。
噚日啱啱又係中大迎新營淫褻口號事件調查報告出爐，強烈譴責有關學生。金耀基意有所指咁話，會盡力確保四十周年校慶嘅活動非常有品味，不過佢話好難懲罰元兇，因為部份不雅口號，可能係由已畢業嘅校友所作。
（圖）呢個紀念章，象徵「騰飛四十，精進日新」。
傳真︰2623-9278
電郵︰