莫文蔚（Karen）前晚出席名牌BottegaVeneta尖沙嘴新店開幕禮，透露聖誕將與大班朋友度過，屆時還會下廚炮製拿手的意大利芝士餅Tiramisu。她表示圈中男星中，只有劉德華試過她的手勢，反而緋聞男友馮德倫卻無緣一試。
莫文蔚及方中信前晚以嘉賓身份往尖沙嘴，出席名牌BottegaVeneta新店開幕酒會。莫文蔚穿上價值七千三百元的BottegaVeneta奶黃色露背裙，揹上同色調織皮手袋示人。
女模陳嘉容、李嘉慧及一名外籍女模，以性感打扮示範各款手袋，新鮮奪目。其他出席嘉賓包括陳法蓉、Rosemary和葉童等。
問Karen聖誕有甚麼節目？她說：「我成日要出外工作，難得有假期梗係同班朋友一齊過啦。我已經接咗order，今個聖誕要下廚整我最拿手嘅意大利芝士餅Tiramisu畀大家食。
「Tiramisu係我喺意大利留學時第一樣學識整嘅甜品，好多朋友都試過我嘅手勢，反而我死黨、時裝設計師何志恩就未試過，咁咪整畀佢食囉。」
問Karen圈中好友中，誰試過她的廚藝？她說：「有次我上蔡瀾嘅飲食節目，華仔（劉德華）就試過嘞，佢都讚我整得好味。」
問Karen有否下廚整餅給緋聞男友馮德倫品嘗？她故弄玄虛說：「唔知呢？我呢幾年都好少下廚，而且整餅都係過年過節先做，整完就派晒畀啲街坊，我唔知佢有冇食過呀。」
Karen又表示今年聖誕渴望收到聖誕樹作禮物，記者笑她聖誕樹又不能招桃花運，Karen即笑說：「唓，我行咗桃花運好耐啦。」
此外，陳法蓉前晚以性感打扮出席酒會，她笑說：「係呀，因為我近排拍緊古裝劇，着得戲服多，咪想扮吓靚囉。」她又表示今年聖誕還未接到男士邀約，她說：「舊年約我嘅男士多到要揀，今年就一個都冇，不過我都會如常同啲教友上街唱聖詩。」