今個月初以來（亦即舊曆11月開始），恒指由高位10247下跌，到噚日低位9477，跌咗770點，跌幅7.5%，個別二三線股有跌3至4成者，亦有少數出現「大插插」場面。
舊曆11月已過了一半，而亦跌咗唔少，後市應該點睇？
再請教高人，佢話11月真係要好小心，大市雖然跌咗咁多，但未跌夠，估計恒指9000亦未必守得住。佢話過會有帳目醜聞，𠵱家果然出現造數事件，聽聞除咗出事嘅3家公司外，重有10家8家公司有問題，呢類醜聞對投資者嘅信心有好大影響。11月呢個係劫數，只要跌夠就冇事，下個月可以重拾升軌，如果跌唔夠，下個月都唔好得。
六福集團（590）半年盈利倒退，宣布後，股價即時大幅滑落，噚日企定之後，稍為回升。
截至9月底止的半年，六福營業額6.58億元，減4.63%，獲利1865萬元，則減35.1%，每股盈利3.94仙，減36.2%，中期息2仙，減0.5仙。
業績倒退，主要是零售市場疲弱，未有起色，珠寶首飾等貴重物品銷貨量，比前同期下跌15.4%，雖然內地來港旅客增加，帶動香港消費市場，但仍未能抵銷整體消費市場疲弱，及外圍因素所帶來的負面影響。一直以來，六福係珠寶行業中毛利率最高的公司，期內為了爭取市場，部份產品略有減價，毛利率由21.58%下調至20.63%，經營溢利率更由5.05%調低至3.45%。
集團在港有22間零售店舖，其中兩間為Iceg.店，另向中國超過70個珠寶零售商提供技術支援及顧問服務。中國入世後，珠寶及金飾業有更大的發展機遇。集團已在番禺購地，興建大型珠寶首飾加工廠，進一步擴大生產規模。
近月金價上升，六福的存貨增值（相比9月結之時），對下半年業績有正面影響，估計全年盈利約4000萬元，每股盈利8.45仙，預測PE9.3倍，並不特別吸引。不過，六福仍會維持高息政策，預計全年派息6.5仙，則息率8.2厘，仍係收息之好對象。
郭兆誠