以識飲識食識享受為傲嘅電盈李智康，噚日揀咗同數碼港貝沙灣一樣係夕陽西照、有山有水嘅屯門黃金海岸，同代理及傳媒搞燒烤樂宣傳個盤。不過全程都有專人代燒。
有李智康嘅地方，靚女又點少得？太陽都未落山，已見到七星伴月，七個靚女model圍住佢吖嘛。李智康興奮到即場獻唱五首歌，包括三首張學友嘅「暗戀你」、「夕陽醉了」同「你是我今生唯一傳奇」，兩首合唱歌「EndlessLove」同「萬千寵愛在一身」，唔知佢係暗示個盤好正吖，定係對住靚女有感而唱呢？
李生話代理如果要做個盤，首先要跟佢上堂，學點樣介紹數碼港同個盤，重有sell個盤嘅技巧同點樣冧客，少樣都唔得，重要考試及格，攞到證書先至有得做。另又同代理講，已經有公司想洽購一幢半㖭，但就要人哋出到每呎七千至八千蚊先有偈傾。
重新布置嘅港灣豪庭巨型售樓處，有別一般聖誕節以紅紅綠綠作點綴，成個賣樓處同對開大片空地，都漆上藍色，如置身海洋中。最特別嘅係，發展商一改聖誕節必用嘅聖誕樹，喺空地上放咗艘大快艇，提醒大家個盤附設嘅大型商場，係以郵輪做主題有關。恒基張炳強重話，放架快艇代表個盤嘅銷情好似隻艇咁快，寓意深遠。蘭西覺得，如果想個盤嘅售價節節上升，放架火箭就最好不過。
花咗咁多心思裝修個售樓處，無非想多啲市民去睇樓，即日至今個月底，去參觀現樓示範單位嘅市民，可參加抽獎，頭獎係值兩萬六嘅雙人挪威之星郵輪十天夏威夷旅遊。
美聯物業高級營業經理伍錦倫同蘭西講，屯門建榮街有成工業大廈地廠業主，持有2.35萬呎單位，原本有客出到每呎約四蚊承租，但業主就嫌係做廢紙回收而拒絕。
結果租畀另一家用嚟放機械器材嘅公司，月租七萬，圍起呎租差唔多三蚊，全包兼一個月免租期，所以實際呎租兩蚊，比市值低一半。聽講業主從事漂染業，後來搬到內地發展，所以將舊廠房出租，佢喺樓上重揸住一兩層收緊租。
中原高級營業董事李子明對蘭西講，佢哋代理嘅長沙灣昇悅居，會喺今個周末、聖誕節同元旦，搞睇樓抽獎，獎品包括酒店美食券，每張價值一百蚊，總共一百張，又送出UA院線戲票，中獎者每人兩張。
聽講呢次活動費用約五萬蚊，全部由中原畀。李子明話，咁做主要係等啲客知道，昇悅居無論喺吃喝玩樂各方面都咁方便。今次送出嘅酒店美食券，全部都係新地旗下嘅酒店，皆因個盤嘅發展商係新地。
繼莊士機構嘅東半山摘星閣，借聖誕同新年搞送禮變相減價，噚日蘭西又收到料，原來中國海外嘅何文田雅利德樺臺（圖三）都係咁，推出「聖誕及新年特別優惠」，今日至本月底嘅買家，可獲贈送四十二吋Plasma電視機一部，價值五萬元，名額十個。
中海地產代理董事游偉光話，早前招標嘅何文田山道十五號以樓面呎價3146元賣出，帶挈雅利德樺臺預約睇樓量大升五成。
有向隅客見到蘭西噚日有關上環帝后華庭退票投訴段文，向本報大吐苦水。
其中一個話借錢入咗六張票，𠵱家要到二十八號至收到退票，搞到要畀多咗透支利息。
另一位就問過發展商之一嘅市建局，對方話二十一號出票畀番發展商，唔明點解要到下個禮拜六至退到票。蘭西問過市建局，佢哋話按規例，公開發售後十四日內要退票，但內購就唔喺限制內。蘭西終於明白，點解今個月七號長實突然賣帝后華庭，一直唔認係公開發售啦，原來有玄機嘅。
蘭西
電郵地址：