香港地，人人自由自在，既有六萬人去遊行反對二十三條立法，振奮人心，亦有六萬人去馬場為香港馬歡呼喝彩，雖然人潮洶湧，港島沙田同樣咁和平，你話幾好呢，特區政府千祈唔好以為製訂一啲惡法就可以減少社會言論聲音呀，一個寂靜的香港，就係冇人鍾意嘅死港；假如香港與上海被同樣一套國安法箝制，外資都會走晒去上海啦，貪香港有乜好？現在佢哋就係鍾意香港能夠嘈嘈閉！
左丁山選擇咗去馬場大聲嗌，為香港馬打氣，由沙圈到馬會廂房到大看台，馬迷愈喧嘩愈覺興奮，最後萬萬估唔到會計師胡世榮隻「計得精彩」會贏香港盃，得獎金1020萬（馬主實收714萬）再加馬會額外獎金510萬（共1224萬），相信胡馬主事前都冇乜信心，有啲發夢執銀紙㗎。但馬迷都同意，隻「計得精彩」臨場所見，弗到漏油，練馬師岳敦的確花咗好大心機，但大家覺得隻馬唔夠卡士，點會夠世界馬王「威武神駒」跑呀？我哋就係中咗呢個盲點，唔敢放心捧場。當然最後隻馬贏得，全靠靳能，右手打鞭，左手推騎，確係世界一絕；嚴顯強平時騎開「計得精彩」，學吓嘢嘞，呢場如果由佢騎，肯定輸咗。
事後馬會廂房啲馬主講，呢隻「計得精彩」兩年前用11萬5千歐羅買番嚟，伸算當時幣值，約81萬，但至今（連今次在內），已為胡會計師贏到實收獎金共1648萬，係馬價嘅二十點三倍，扣除養馬費，仍然賺到笑，的確係計數計得好精彩。