自從爆出有股仔造數上市事件後，好多新股上市及炒家活動，都打算暫緩，部份經紀講明情願食少多覺瞓。年輕賓架話，聽聞呢單嘢牽連好大，唔知雪糕佬行動規模有幾大。
股仔氣氛唔好，噚日大慶石化（362）同利來控股（221）股價出現過山車走勢，相當驚險。首先講大慶，呢隻股小初以往曾講過，聽聞部份炒家財力只係一般。隻股噚日一度被質落0.14元，收尾幕後炒家出嚟收拾殘局，股價先至升回0.22元收市，但全日仍跌27.87%。成功摸底嘅勇士當然happy，但睇嚟人數就唔慌多。
至於另一隻利來，股價之前已經有腳軟迹象，噚日一度跌至0.243元，收0.33元，全日下跌7.04%，冇大慶咁激。
小初問年輕賓架點睇，佢叫小初短期都係唞一唞，過咗聖誕先算，皆因佢做開融資，知道近期銀行在放數方面一定會謹慎好多，水源唔多嘅股仔，自然難有大型炒作活動出現。
慕容小初