九龍東六個大型屋苑，九龍灣德福同麗晶、牛頭角得寶同淘大、觀塘麗港城同藍田滙景花園，大部份樓齡近二十年，好多業主已供完樓。好似居屋麗晶花園，近六成八，3516戶已供滿。中原睇準呢班換樓客，喺離開咗差唔多三年嘅德福廣場再開分行，實行搵大錢！
中原九龍區董事劉瑛琳話，今次中原加強九龍東區人手，因為嗰區最快要到04年先有新盤落成，但區內潛在購買力，可「射客」到將軍澳、西九龍等新盤供應量多嘅地區。而德福分行會有二十個夥計，三成新丁，三成係區內打滾多年嘅熟手經紀，餘下四成係工作經驗較淺嘅經紀。佢地𠵱家已請咗十四人。
據蘭西了解，早兩年已有好多東九龍區業主買將軍澳、西九龍區嘅樓花，等入伙時就搬過去，難怪中原有信心新分行嘅營業額，可以較今年嘅250萬至280萬元，增加三到五成啦。
有關早前有買家投訴，遲遲收唔到上環帝后華庭退票，蘭西跟進後，發展商話今個禮拜六會搞，點知原來重有下文。
噚日蘭西收到一名等退票嘅向隅買家來電，話長實打電話問佢重有冇興趣買帝后華庭單位，當知到佢無意思，就話退票係由新世界負責。佢於是就問新世界啦，對方話要到本月28號至得喎。
呢位向隅買家又向消委會查詢，對方問番佢有冇睇清楚啲條文，於是細心一睇，發覺原來內容含糊不清，咁即係冇得投訴啦。
佢大呻，咁樣發展商咪可以揸住啲錢十年八載唔退畀人都得啦。佢除咗想早啲攞番退款外，都希望發展商做嘢可以合情合理啲，唔係只會影響公司嘅商譽。
電訊盈科薄扶林數碼港嘅住宅部份，正式命名貝沙灣，今日就打正旗號，邀請記者參加「貝沙灣池畔燒烤聚會」，但地點就喺屯門黃金海岸酒店。
聽講由太古過檔電盈嘅顏金施到時重會一展歌喉，曾經熱衷夾band嘅電訊盈科基建主席李智康重會伴唱㖭，實行搞到好似小型演唱會咁。
據聞電盈為加強氣氛，唔單止搵十個名模到場表演，連貝沙灣重未出街宣傳片中嘅靚女主角都會現身，有歌聽重有靚女睇。
中銀香港旗下地產部門僑光置業，啱啱搵咗卓先地產，標售沙田半山豪宅杏苑山莊六幢洋房，明年1月21日截標，估計市價四千二百萬元。
六幢洋房，單位由一千五至一千八百方呎，各有約五百五十至一千五百呎花園，其中四間連租約，租期到明年5月。
截至今年9月，每個月近十六萬二千元租金，啱晒買入做長線投資。
莊士機構同輝億發展嘅東半山摘星閣，執過一輪嘅「空中花園」同「私家花園」系列，今個禮拜六正式開放，重將最後十三個單位一併發售，呎價5443蚊。
發展商話搞「厚禮大行動」，所有買家都獲贈樓價一成現金做聖誕同新年禮物。單位售價由185.8萬到530萬，即係買家最少可以慳番差唔多二十萬，最多重成五十三萬㖭。
蘭西
電郵地址：