喺陸羽飲茶之時，見到成兩個月冇出現嘅投資T。投資T原來上咗東北搞農場，當然唔係歐亞農場啦。雖然離開香港好耐，投資T對香港啲八卦新聞非常熟悉，例如雪茄林槍殺案，發生在陸羽地下，佢都瞭如指掌。
左丁山問投資T：「你好似日日都喺香港噃，邊度係上咗東北呀？」投資T答：「你有所不知，我住喺瀋陽，日日睇《東方日報》，上面有六張香港報紙可以訂嘅，就係《東方》、《經濟》、《信報》、《文匯》、《大公》、《明報》。香港商人絕大部份訂《經濟》、《信報》，我就訂《東方》，每個禮拜日去食飯飲茶，我哋就帶埋報紙去交換睇，睇到津津有味。」點解唔訂齊三份呢？投資T話：「好貴㗎，三個月訂費要一千七百蚊。如果唔係大癮，點捨得訂。」咁高嘅訂費，幾好賺噃，唔知分銷商同報紙點樣分帳呢？
投資T話去旅順參觀過日本人嘅「滿洲國」監獄，佢參觀當日，天氣嚴寒，溫度係零度以下，監獄內冇暖氣或任何生火禦寒設施。監房係一個個狹小石牆房間，房內有磨石床，坐上去都凍到震，想當年唔知有幾多中國人在此凍死。投資T參觀咗二十分鐘，渾身不自在，猛打噴嚏，急忙鬆人。投資T講：「喺監獄內，只覺陰森恐怖，寒風陣陣，我又唔係日本人，俾啲幾十年前嘅冤魂誤會咗，就唔抵啦。」旅順留番呢座監獄都幾好，起碼有此為證，唔怕歷史失憶。