「香港打乞嚏，澳門就傷風，我哋唔希望香港乞嚏。」澳門核數師會計師公會理事長梁金泉說：「香港係大佬，澳門的而且確係小弟弟」，但一直以來香港不太注重與鄰近地方的關係，「你事事要做龍頭大哥，樣樣要帶領珠江三角洲發展；我哋就認小弟弟啫，其他國內城市會唔會肯呢？」他一語道破香港四面楚歌要靠中央撐的底因。
與香港經常保持聯繫的梁金泉，也是澳門特首何厚鏵的智囊之一。「何特首要我哋睦鄰，話要同鄰居保持良好關係。」所以梁金泉對於港人治港是否比不上英人治港、特首角色對一個地方管治的成功有多重要、董建華作為一個特首是否合格等問題都有意閃避，但始終仍口快快說了「不該說的話」。
「我只見過董建華一次，就係上月二十日喺香港舉行嘅世界會計師大會。面對幾千個來自海外嘅會計師，佢喺歡迎酒會做主禮嘉賓，連歡迎說話都唔講，只『啊，乾杯』咁就走咗去。」翌日朱鎔基在大會上講話，當大家仍忙於咀嚼「不造假帳」的時候，董建華才來說「歡迎……」，梁金泉謂：「咁係咪喺唔適當嘅時候做唔適當嘅嘢呢？」
何厚鏵則親和力甚強，每年邀請一大班人談論施政方針，作為座上客的梁金泉說：「大家會覺得佢係朋友」，對老闆「我使乜拍你馬屁啫」，但對朋友就會積極支持，「佢肯同你傾，肯接受你意見，出到來真係你啲嘢！」
「香港人視噪音影響香港繁榮，會令政府行慢咗；但係澳門何特首歡迎噪音，因為噪音可以幫官員做得好啲，刺激思維，令社會有進步。」
澳門回歸三年，政府雖公布了多項基建和紓減民困措施，但仍收支平衡，梁金泉不諱言是幸運，因為賭權開放後，很多內地人及外地人到澳門賭錢，令稅收增加；但「香港何嘗唔係喺金融、轉口、兩岸商機得到好處呢？只不過佢唔發展之嘛！」
梁指出，內地極需要資金，外國有極多迴避直接進入大陸的游資，由於香港沒有外滙管制，「深圳同上海冇可能取代香港嘅金融地位」；此外，香港擁有珠江三角洲最優良、最方便的港口，問題在於港口收費高，「香港轉口費貴，無形中迫死細廠仔」。
至於與台海兩岸有關的商機，他舉例，可發展大中華無線電話網絡，一個電話號碼通行兩岸四地，收費比國際漫遊便宜一半，港元可作為大家都接受的結算貨幣。
「你嘅長處係跑步，你就走去游水；游水你又揼心揼肺話唔夠人快！」梁金泉慨歎：「香港做好本份已經夠啦！」回歸之後，「香港好似魂遊咁，冇方向感」，令他也覺得「好唔抵」，因為若香港繁榮，「肯定會帶旺澳門」。