噚日我哋體育版講過，碧咸喺歐洲足球先生選舉一票都攞唔到，係因為佢喺傳媒工作者眼中唔夠投入；話口未完，佢即刻喺世界足球先生選舉上攞到唔少票數（五十一票），證明佢喺教練眼中有一定嘅作用同埋地位。兩個選舉投票人士角度唔同，所以好難憑票數論英雄。
我求大俠覺得教練投票選心目中最佳球員，都會集中喺球員嘅表現，碧咸招牌罰球經常建功，同埋佢喺世界盃負傷領軍，都應該可以攞番唔少分。反而記者投票準則多少都會受到球員場外新聞影響，而碧咸又玩時裝設計等「副業」，唔多專心發展足球事業，不過去到一票都冇，唔使講都知同記者關係點啦！
前晚曼聯對車路士，比賽早段華朗同埋車路士嘅摩利士一次搶波互相「晒靴」，華朗雖然搶唔到個波，但就整咗記「穿心腿」畀摩利士歎。當地電視台最後顯示華朗食咗個黃牌，但係我求大俠就睇到個球證只係叫華朗埋去勸佢冷靜啲，而且賽後報告亦無提到華朗有被記名，可見原來電視台打出比賽資料，都會有一廂情願嘅時候！
熱刺老將費迪南周一晚喺預備組賽事上陣對阿仙奴時，因為同對手中堅有爭拗，結果攞紅牌出場，重俾足總判停賽三場，連上陣機會都無，搞到其他球隊無得「睇辦」，想喺轉會市場重開時離隊機會就會大減。話晒費迪南都係一個好前鋒，我求大俠惟有祝佢好運喇！
曼聯贏車路士打入聯賽盃四強，贏波功臣莫過於科倫，呢位烏拉圭前鋒一有正選上陣，都好識把握機會，喺球迷面前攞番唔少分數。話時話，以曼聯𠵱家人腳同狀態咁弗，費爵爺早前提過擴軍嘅計劃，怕且都可以暫時擱置囉！
○六年世界盃決賽周各洲席位就已經落實，被削咗半個席位嘅南美洲當然唔高興，因為南美洲球隊喺附加賽好大機會贏大洋洲區代表，𠵱家無得打即係無咗一席。不過，我求大俠覺得大洋洲區近年水準不斷上升，攞番一個直接出線資格係應得，而且除咗巴西同阿根廷，其他南美洲國家足球水準下降，減半席都係啱。
逢周一至周五見報