聽講東涌線九龍站有平嘢執，$80件DKNY貨辦（屬真貨，唔係加記扮廠辦），一於走去睇睇，果然屬實，廸生由數碼場轉型做特價場，賣大量歐美名牌廠辦同貨尾，一百幾十蚊搞掂。離去之際撞見RedWing代理「商貿L」，佢喺九龍站搞咗間RedWing博品館，店內展出RedWing過去輝煌歷史，重有大量難得一見紅翼紀念品，商貿L：「啲紀念品唔賣㗎，純粹展覽嚟滿足Fans，如果Fans鍾意不如攞嚟送喇。」
商貿L繼續講：「今個月22號（星期日）呢間博品館正式開張，搵咗最新代言人Juno助興，我刮咗好多貨倉珍藏紀念品大送特送，有批絕版舊工衣好有珍藏價值，一於當日送晒佢，再送《8里公路》首影禮戲飛，又有明星睇，記得嚟趁吓熱鬧。」
商貿L傾唔夠幾句，立即離去上蛇口，原來為國內第一間RedWing專門店準備，聽講今次連美國總部都好睇重國內開RedWing專賣店呢單嘢，全世界都向北望，果然冇錯。
聽講今個冬季RedWing香港專門店生意勁過上年，原因有批日本仔來港掃走成批BikerBoots貨尾。走水貨嘅千祈咪走漏眼喇，帶兩對過去同㗎仔Trade應有數為。