梁朝偉因贊成六四屠城言論而廣受各方指摘，昨晚他出席《英雄》首映禮時，主動談及此事，表示之前所言全是戲中角色殘劍的意見，並非其個人的意見。殘劍乃電影中生活在戰國的虛構角色，怎會對二千多年後發生的六四有意見？偉仔之言難免備受質疑。而負責訪問偉仔的《BInternational》雜誌編輯，則否認有誤會梁朝偉的意思，強調訪問內容完全是照偉仔之言所寫。
梁朝偉日前為宣傳新片《英雄》，而接受最新一期南華傳媒出版的英文雜誌《BInternational》訪問。他在訪問期間提及六四事件，並表示當日屠城的手法是正確的，因而惹起軒然大波，各界群起指摘偉仔。
前晚偉仔的經理人公司即時發表聲明，指《BInternational》對偉仔的言論有引述上的錯誤，偉仔只是針對電影內容回答問題，但並不代表他個人對政治事件的看法，並對今次誤會感到遺憾。
昨晚《英雄》在灣仔會展舉行首映，特首董建華和主唱《英雄》主題曲的王菲亦有到場。而梁朝偉更主動接受記者訪問，似是有備而來的他說：「我係一個演員，唔係講政治，我講嘅嘢係片中角色殘劍嘅意見，唔係講緊我自己嘅意見，我唔想將誤會複雜化，唔想觀眾將呢樣嘢帶入戲院睇戲。為咗呢部戲，導演張藝謀同工作人員花咗好多心機，如果因為咁對部戲有影響，就對佢哋好唔公平。」
偉仔續說：「如果有人因呢件事對梁朝偉有乜個人睇法，我唔介意。個訪問所講嘅唔係我當初嘅意思，造成誤會我好遺憾，件事要到此為止。」問偉仔所言是否指事件被過份渲染時，他說：「我唔想複雜化，我只係演員。」
記者再問偉仔個人對六四事件及當時屠城的做法有何意見時，他只望一望記者，不發一言即時離去。其後偉仔在一群穿上秦兵服飾的士兵陪同下，負責敲打鑼鼓儀式。
而張曼玉昨晚則穿上一件以金色珠片砌成的仿共產黨標誌的黑色上衣示人，她主動提到早前曾到北京人民大會堂出席首映的情況說：「我好娘咁，去到咁大地方，見到咁宏偉嘅會堂，感受到中國好偉大。」至於《英雄》的投資者江志強則宣布該片已順利通過奧斯卡初審。
此外，對於偉仔經理人公司將今次風波歸咎於雜誌引述上出現錯誤，當日負責訪問偉仔的《BInternational》總編輯AngelicaCheung昨日接受本報電話訪問時說：「梁朝偉講六四完全係佢自己嘅意見，當時我哋講到《英雄》嘅theme（主題）同message（信息），我完全冇問過佢關於六四嘅問題，係佢自己攞嚟舉例。」
問到AngelicaCheung當時偉仔是怎樣講述其見解時，她強調說：「佢點講我就點寫，我亦冇勉強佢講任何嘢，好似劉嘉玲我都冇提過。當時梁朝偉好冷靜同好嚴肅，我哋傾得好好，佢重要求做晒訪問先影相。其實睇番成個訪問嘅上文下理，佢講嘢係好有邏輯嘅，我肯定冇misunderstanding（誤解）。不過佢講六四係針對屠城定係講政府嘅政策同態度，定係有其他意思呢？我諗最好問番佢，我唔知佢係乜意思，佢咁大個人點會唔知自己講乜嘢。」
AngelicaCheung又表示她是以廣東話訪問偉仔，當時並沒有錄音，她只是以筆記記下偉仔的談話內容，但她不願將筆記公開。而訪問期間，亦有電影公司及偉仔經理人公司的人員在場。問AngelicaCheung會否將偉仔原本的說話公開時，她說：「你直接將英文繙譯，就係嗰個意思。」
採訪：何永寧、蔡如玉
攝影：林德雄、陳偉權