我羅拉話晒都係女人，當然鍾意睇靚仔多過靚女啦，最近日本有雜誌介紹新一年「最睇得過」嘅新紮男星，由兩個師奶級嘅著名女作家頒咗幾個「男之NUDY大賞」畀佢哋，我即刻眼前一亮，直頭好似發現新大陸咁！
千祈唔好以為又係木村拓哉或者香取慎吾威晒，事關佢哋打赤膞已經司空見慣，𠵱家要睇，梗係睇中性型男Gackt啦！佢早排為咗拍美容院廣告，專登練咗八嚿腹肌出嚟，睇到啲女士嘩嘩聲，最近佢另一張睇晒全身嘅裸照又被公開，嘩！……不過，點解Gackt一條腳毛都冇嘅？根據評審嘅女作家表示，畀Gackt攞冠軍係因為佢係唇紅齒白皮膚滑嘅美男子極品喎！
但如果閣下只鍾情陽剛味重嘅男人，咁就不妨留意吓最近喺日劇《綠色聖誕節》中奪去菊川怜螢幕初吻嘅海東健啦！佢呈三角形嘅上身據講係練得滑水多嘅成果，有女fans重話佢周身毛夠sexy㖭！而其他入圍嘅黑馬「佳麗」重有永井大、須賀貴匡、玉山鐵一同要潤等等，全部都係我羅拉二○○三年嘅心水！