高官帶頭減薪救財赤嘅問題近日再被炒熱，噚日三司十一局高官齊集立法會開大會，梗係免不過會俾人追問啦，好多局長似乎都有備而來，惟獨是衞生福利及食物局長楊永強一聽到呢個問題就向傳媒發炮。
楊局長起初都講得頭頭是道，話呢個唔係個別官員嘅問題，一切等政府決定。不過跟住就開始話記者問呢啲高官減薪嘅問題好無謂，又話財赤咁大，一定要開源節流，象徵式嘅嘢梗係要做啦！有人又問，咁擔唔擔心高官減薪會對公務員造成壓力呢？一聽到呢條問題，楊局長更加無明火起，問記者究竟想點、問嚟做乜？佢不停口話問題「好無謂，好無聊」，重問記者係咪想攞到個答案，等佢俾人鬧，後嚟重發侮氣話：「你咪鬧囉，唔緊要㗎！」
一向臉紅紅嘅楊局長，四分鐘不停鬧，搞到成塊面紅上加紅，講講吓又話人工對自己唔係咁重要，重反問記者：「我𠵱家問你呀，你問我嘅目的係乜嘢？」
突然俾局長問番轉頭，有記者忍唔住埋怨政府嘅透明度，因為如果有透明度，傳媒就唔使自己攞苦嚟辛，逐個官去問啦。不過，如果唔係楊局長連環開炮，八方都唔知讀番書嘅佢，中文原來都唔差。
傳真︰2623-9278
電郵︰