《SAGA》系列可謂SQUARE另一搵錢王牌作品，不過自從登陸PS後，以立體化為賣點似乎唔係咁受機迷歡迎，所以今集決定回歸原點，以2D為主要表示，所有背景都繪得極之壯大美麗，七名主角設計更各有風格，當然唔少得靚仔同靚女啦。
記者、攝影：徐影龍
一路以嚟，《SAGA》系列同其他RPG最唔同地方，就係不設地圖移動範圍，只要到過一次，以後只需喺地圖上一指，幾遠都可即時到達。新作《UnlimitedSAGA》將呢點更為發揚光大，不但承繼大地圖一指即到移動方式，就算入到城鎮都係以一張背景相表示，要去宿屋或道具屋唔使慢慢搵，又係一指就即到。咁做好處係令遊戲流程加快，來回同一目的地毋須行餐懵，不過咁改法，好多RPG迷一時間未必接受得到。
進入迷宮後亦煥然一新，同樣唔使慢慢行，畫面會顯示一小段路，主角會像《大富翁》般一格一格移動，遇到分支路，玩家決定往左或右，敵人及事件均要踏正該段先會發生。
戰鬥系統可謂另一重大變更地方，採用隨機遇敵形式，戰鬥時採用回合制，不論參戰成員有幾多，每回合都只可行使五次攻擊動作，甚至一個人用盡五次攻擊都得，亦可轉為「連攜技」，組成強力必殺技，如將「炎之弓」連續五次使用，便會出現名為「炎之炎之炎之炎之炎之弓」，攻擊力亦大得多。系統亦保留部份舊作風格，如分體術、短劍、大劍等招式，戰鬥中亦自動學會新必殺技，用家若想快點學會新必殺技，必須多點使用某項必殺技，如專長屬劍系或棒系等，不應五時花六時變，搞到難以學懂新技巧。
《SAGA》系列特色係一味夠人多，《UnlimitedSAGA》都唔例外，一開始已經有七位主角畀你揀嚟用，每位主角設計上都好有特色，而且除故事背景不盡相同外，能力值同擁有嘅技巧都有分別，如強勁嘅劍士或魔法師等，有啲重可以拆陷阱、開寶箱，難易度當然亦有所不同，玩家應細心分析角色類型而揀選，發展獨有嘅故事。至於未被揀選嘅角色，亦會以同伴方式登場，不過暫時未知會否像舊作般，設有隱藏同伴。
售賣點：DreamStore
地址：灣仔東方188商場256號舖
電話：25753285
超任上盡顯光芒
《RomancingSAGA》系列比同廠《聖劍傳說》出世得更早，雖不及同廠《FF》系列咁多Fans，不過當年採用多主角系統，及獨特世界觀而吸納唔少機迷。未計GameBoy版本，首三集均只喺超任上推出，成為超任時代SQUARE重要王牌作品之一。
《RomancingSAGA》（SFC）
突破當時之RPG慣例，以多位主角引發不同之故事，移動方式亦有別過往在地圖上慢慢行，只需一指便可到達世界各地，令遊戲流程增加爽快感。
《RomancingSAGA2》（SFC）
同樣可自由揀選七位主角，目標為統一大地，新加之繼承系統讓新主角學會舊有招式，故事表達更為壯大。
《RomancingSAGA3》（SFC）
雖然仍採用八位人物做主角，不過加入大量隱藏同伴、招式及特殊事件，機迷日以繼夜誓要搵齊所有秘密，畫面大幅強化亦係超任時代最好，筆者認為屬系列最顛峯之作。
《SAGAFrontier》（PS）
首次移植至PS之作，雖同樣繼承多主角系統，不過故事性及遊戲性遠遠不及前作，加上立體化後完全失去舊作風采，令此經典系列失去不少Fans支持。
遊戲類型：RPG
對應機種：PS2
遊玩人數：1人
價錢：$360（行貨包年曆一個）
開發商：SQUARE
(c)SQUARECO.,LTDALLRIGHTSRESERVED.