大半年前，單親媽媽阿雲與五名子女，懷着興奮心情接過新居鎖匙，卻萬料不到他們會因此墮進欠債漩渦。由於家境一向清貧，阿雲早前迫不得已用綜援金去繳付各項搬遷雜費，惟在「九個蓋冚十個煲」的情況下，終導致連月來的基本生活無法應付，幾乎斷水斷糧。
「我真係冇諗過搬一次屋會搞成咁，呢半年嚟日日都要為個『錢』字煩，壓力好大。」面容憔悴的阿雲歎着氣道。
五十二歲的阿雲，經歷過兩段失敗婚姻，現靠綜援金獨力撫養五名四歲至十六歲子女，當中包括患有心漏症兼智障的么子。「一個女人要帶住五個細路哥，真係唔容易，但既然自己兩次都揀錯，就冇辦法，𠵱家我最痛苦係要幾個仔女同我一齊捱，真係好想有人可以幫到我哋。」
今年四月，阿雲一家六口喜獲房屋署編配公屋單位，惟鑑於社署不會發放搬遷津貼予單親家庭，她為此大費周章。「我同房屋署簽咗租約，先知道社署唔會有搬遷津貼畀我哋，嗰時真係好彷徨，房屋署要我交上期、按金、泥頭費，接駁水、電、煤、電話又係全部要先畀按金，咁多嘢夾夾埋埋足足要成一萬蚊，當時真係迫到我走投無路，最後惟有攞啲綜援金頂住檔先。」
雖然搬遷費問題得以暫告一段落，但阿雲此後的生活更形困苦，她形容這段日子為六母子經歷過最黑暗的歲月。
「啲錢左冚右冚都搞唔掂，好似呢個月，細仔心臟唔舒服，頻頻入咗幾次醫院，車費使多咗，就連開飯都冇錢。」就記者採訪當日所見，阿雲與子女的晚餐就只有一窩青菜麵條，甚麼餸也沒有。
除了吃不飽、穿不暖之外，最令阿雲憂心的，就是欠租多時，房屋署已發出了最後通牒，日內如再不清還，便會勒令他們遷出。
與此同時，阿雲亦收到電燈公司及煤氣公司分別寄來的最後通知書，要求阿雲即時繳付欠帳，否則將採取截電、截煤氣的行動。「𠵱家我真係冇晒辦法，一係同幾個細路哥一齊瞓街，再唔係就將佢哋送晒入孤兒院，唔使跟住我呢個媽咪過得咁賤。」阿雲紅着淚眼說。
蘋果日報慈善基金了解過阿雲一家的困境後，即時撥款一萬元，助她清還所有欠費及應付眼前的生活急需。
捐款編號：C0777
暖流熱線
電話：29908688
傳真：23702192
電郵：
網址：