林曉峰（阿Lo）今日同女友康子妮拉埋天窗，依照中國人傳統，新人喺結婚前一日應該唔好見面，但阿Lo同女友就打破禁忌，噚日重一齊約埋去睇狗㖭。
噚日下晝四點幾，阿Lo單獨一個人坐的士返佢位於跑馬地嘅屋企，準新郎心情大靚，企喺度畀記者任影唔嬲，佢重同記者講：「我嘅心情都有少少緊張，但我哋嘅婚禮冇上頭儀式，冇接新娘，我阿哥﹙林海峰﹚同家姐﹙林珊珊﹚都冇呢啲嘢啦。」阿Lo又話冇見康子妮，自己都有啲囉囉攣，但自己會依照傳統，就係唔同佢見面。
點知話口未完，佢就揸車去旺角嘅「頂好眼鏡」攞咗副新眼鏡，之後即刻揸車去跑馬地嘅山村台，接康子妮同埋一位男士，一齊去附近嘅寵物店睇狗，原來佢哋養咗兩隻若瑟同一隻魔天使，因為婚後度蜜月嘅關係，所以擺喺店中寄養，對於自己話唔見之後又見康子妮，佢就話：「年輕人，𠵱家唔興呢啲嘢啦。」
陳見飛同麥浚龍（Juno）噚日到鑽石山荷里活廣場出席新城《聯Fan所》活動，Juno同陳見飛都係今年嘅新人，所以噚日佢哋都乘機拉票，好明顯Juno嘅歌迷多過陳見飛，問到佢哋兩人對對方嘅睇法，陳見飛竟然大讚細粒嘅Juno着衫好睇，重話佢好似細佬陳冠希（Edison）一樣着得咁靚喎，不過講講吓原來Juno同Edison曾經一齊喺香港某間國際學校做過同學。
一直同周杰倫傳緋聞嘅台灣女藝人蔡依林，日前喺台灣拍戲嘅時候，喺片場頻頻落淚，有傳話佢係因為被情所傷，所以先至會咁傷心。話時話，周杰倫早幾日嚟香港，搵咗徐若瑄做表演嘉賓，唔知蔡依林係咪呷徐若瑄醋而喊呢？
陳奕迅﹙Eason﹚嘅演唱會喺明年二月十六號開鑼，佢女友徐濠縈會為佢今次嘅演唱會搞形象，而Eason今次喺個唱度邀請梅艷芳、關淑怡、陳小春、張學友同陶喆上台演出，而佢想請但未請嘅重有謝霆鋒嘅女友王菲。
陳淑蘭同苑琼丹合作嘅《今日女性不再是弱者》棟篤笑噚日喺九龍塘一間會所舉行記者會，因為人事調動，有個寫稿嘅人唔撈，所以臨時搵咗林敏驄幫手。苑仔同蘭子話好在阿驄幫佢哋寫稿，唔係都好麻煩。
蒙嘉慧噚日去咗金鐘港麗酒店Clinique嘅活動。對於一同拍《衛斯理》嘅拍檔羅嘉良喺車禍後不顧而去。蒙嘉慧就代嘉良講好話，佢話：「可能當時情形好混亂呢？我自己都揸車，揸車時要兼顧好多嘢，個人係會躁啲嘅。」