市傳環球基金見美元急挫，開始減持美元資產，港股自然亦受影響。恒指下挫167點，收報9548，成交60.54億元，期指成交明顯大增。i師傅話，市傳有一大戶掃入幾千張期指淡倉，令到期指成交增近2萬張。以上淡倉如果唔係一般對沖活動，後市可能有消息跟尾，最有可能係美股出現大調整或大震倉。
港基（636）雖然有意賣盤，但本地銀行多數表示冇興趣，連工銀亞洲（349）亦表示冇興趣。其實香港銀行業現時競爭激烈，而日後相信會更為劇烈。銀行進行收購合併，主要想通過業務合併達致協同效益，但港基與管理層簽有長約，自然成為買家一大考慮，除非阿銀搵到個肯做被動大股東嘅投資者，否則都幾難賣得出港基，就算賣得出，價錢都唔慌理想。港基復牌後連升兩日，噚日仍在2.675元高位徘徊，但成交開始下降，只有2339萬元，現時有貨者，其實要考慮需否沽貨。
新醫藥（8085）噚日再挫9.7%，收報0.14元。黑客話，市傳有人試盤，睇吓有冇人想要貨，以及幾錢至肯接貨。阿虎自然耍手兼擰頭，因為此股曾經試過復牌勁跌99%，事件記憶猶新，如今又話要配售抽水，相信冇邊個敢冒險，有錢都留番暖吓袋。
會德豐（020）噚日復牌，除咗被私有化嘅聯邦地產（077）急升25%外，新亞（049）急挫8.2%；會德豐亦挫6.8%。會德豐在停牌前已經炒咗一轉，由於只係新亞私有化聯邦，故出現獲利回吐好正常。相信新亞最終會被私有化，但由於會德豐負債率較高，即使進行私有化，可能只會以換股形式進行，當然冇現金收購咁受歡迎。
阿虎