今次真係走寶㖭，冇聽經紀陳話去買中保永興（621），博佢業績由虧轉盈炒高。隻股噚日最高見過0.135元，收0.13元，升幅25%。
不過，隻股成交只得305萬股咁大把，金額唔夠40萬元。小初一個人落場，走去扮莊家都得。
睇嚟中保永興目前仍處於無政府狀態，咁嘅環境好難發圍，加上成交咁濕碎，小初都係食少多覺瞓。
經紀陳見小初咁大口氣，於是就叫小初改為留意隻美蘭機場（357），佢話聽到班芬佬講，隻股年尾有機會mark價作櫥窗粉飾，博好成績有得分花紅。
美蘭以3.78元招股上市，除咗第一日股價湧過上4元樓上一陣之外，其餘時間在3.80元至3.90元之間徘徊，叫做守住招股價。
聽聞隻股有個大隻佬揸重貨，而其他短炒投資者，睇怕都沽得七七八八，所以年底mark價嘅傳聞，未必假得晒。
慕容小初