「經濟困境時，政府角色幾重要，起碼畀到信心啲人」，一九八四年至九二年在香港中文大學統計學系及商學院讀書，現為澳門大學商學院經濟及國際金融講師的林文堅指出，澳門政府前兩年也有過令人缺乏信心的時間，工人上街示威。
「澳門有段時間做唔到嘢，但係承諾都唔特別多，何特首只係話『我哋有嘢做緊，適當時候你就會睇到』，冇拍心口指好多條路畀你。」後來市民見到開放賭權拍板等，「似乎做到嘢時，市民信心就會出來」。
「香港經濟一路轉壞時，政府嘗試同大家打強心針；市民似乎聽完之後放心啲，但隔一段時間，原來唔係咁，接二連三做唔到時，就連政府講嘢都唔信。」林文堅對香港的情況也很了解。
「董建華政府以前提出過好多目標，例如發展乜乜中心，商界都好興奮、好多活動，但係搞搞吓好似冇乜嘢，即刻跌晒落嚟，特首民望又跌埋落嚟。」
林文堅認為，何厚鏵的施政方針頗能配合時機，例如澳門回歸初時，「好多人以為公務員隊伍要搞一搞」，但何厚鏵則一再強調要穩定，至今未提過公司化、合併、外判等，「我認為咁做幾適當，如果呢段時間連公務員都配合唔到，政府就完全做唔到嘢。」
至於政治手腕，也是何厚鏵勝出一籌，林文堅說：「佢成功令自己作為社會嘅信心」，政府當中永遠以他最有威信；香港則相反，「有乜唔好就賴特首，永遠矛頭指住佢」，他坦言，「香港特首嘅個人魅力麻麻哋」。
他認為香港政府最大危機不但在赤字，更在於對前景惘然，「如果係強勢特首，最少市民心靈上可以有個依賴。」但現在「好似連搵支竹仔支撐吓都冇」。如要勉強打分，他給何厚鏵八十分以上，董建華六十分──很有禮貌，尚算及格。
走在澳門街頭，覺得很閒適。市面算不上十分興旺，比起九七年的瘋狂景象還差好一截，但接受現狀的澳門人都很寬容，沒有香港人常見的憂鬱和緊張；他們不一定都認同何厚鏵，但起碼接受他，接受他任特首。