美股急升，港股唔多跟貼，恒指係咁意升得59點。大藍籌榮辱不一，前日帶動大市向下嘅滙豐（005），昨日成為領導恒指向上嘅火車頭，滙豐窩輪，Call輪同Put輪走勢調轉，做輪捉得正嘅贏到笑，捉唔正嘅輸到喊。正股上落唔定，炒即市唔易搵錢。
九倉（004）月初見17.40元後，陰吓陰吓得番15.70元，冇咗1成。上月，九倉兩次低見15.35元即有支持，不妨吼住正股喺呢個位揸啲九倉Call輪，對象係9476。
隻輪明年6月到期，現價24.5仙，溢價4.0%，槓桿率6.4倍，數據屬於吸引，等正股回落到支持位，候低價買輪。
中信泰富（267）逆市跌15仙，收15.25元，睇走勢可能再考驗兩星期前低位15.10元，現價同呢個低位只係相差好少，但對啲相關Call輪嚟講，可能代表10%嘅分別。中信Call輪9480近期成交轉增，平均每日有一二十球轉手。明年4月到期，現價6.4仙，溢價13.7%，槓桿率23.8倍，吼住6仙以下買入，做短線，有幾個價位即回吐。
𠵱家炒輪，凡係溢價高者，切記咪坐盤坐得太耐。另1隻同類輪9298，壽命長啲，槓桿率大啲，溢價自然高啲，現價5.1仙，吼4.5仙博反彈。
章盛