星期五中午到陸羽飲茶，只見全場滿座，生意好過平時，槍殺案似乎對陸羽生意冇乜影響噃，反而成為陸羽故事嘅一部份，將來更加吸引新客。好多人唔知，招牌愈老愈妙，愈係多故事在老店發生，愈會增加老店嘅myth。香港已經冇老店啦，唔可以學巴黎人講：「呢間咖啡店係畢加索至愛，嗰間海明威留下不少腳毛」五十年後，如果陸羽仍然屹立不倒，我哋嘅孫輩到陸羽飲茶，可以講：「我阿爺喺呢度飲茶㗎，嗱，嗰邊就係雪茄林被槍殺張枱……」到時陸羽一定成為遊客必到嘅歷史文物。
可惜有啲集團唔識老招牌嘅好處，鍾意就換吓。置地廣場間高級日本料理名店「弁慶」（Benkay）裝修四個月，兩星期前重新開幕，居然連個招牌都改埋，叫做「賀菊」（Kiku），好彩入邊嘅侍應部長大多數係舊人，熟客入到去仍然知道「賀菊」即係「弁慶」，新客就以為舊店執笠，新店開幕。
左丁山好唔明白，舊招牌好多人識，日本遊客亦熟，點解有二十年商譽嘅舊名字，竟然捨得丟棄？據侍應講，舊名用得太耐，舊裝修用得太耐，老闆覺得要追上時代，追上潮流，等人客有新鮮感，故此全新裝修之後，連名字都改埋。如此邏輯，確係高深，非左丁山所能明白。假如鏞記、陸羽每隔二十年就搞新鮮感，改名一次，相信可能已經執咗咯。