阿松成日話香港傳媒報道唔準確，結果今次佢去南京，就輪到話內地嘅《揚子晚報》作新聞，虛構佢大談同老婆小伏閨房樂嘅訪問，結果要《揚子晚報》向阿松道歉了事。
其實阿松向記者講過嘅事又唔認帳，都有前科，話說有次佢返大陸，喺火車上同記者講「基建下馬論」，事後被立法會揪秤，又反口話冇講過，係傳媒理解不清嘅炒作。八方知道火車上嗰班親耳聽住佢講嘅行家，事後好多都一肚火，呢次到底阿松有冇爆自己啲「私事」，就只有天知地知、佢同個記者先知。
不過訪問中提到嘅小伏有喜，八方最近都收到讀者報料，十二月十日晚上七點幾，喺時代廣場連卡佛，見到身穿黑色大衣嘅小伏，腹部明顯隆起，「毋須再猜度懷孕之說了」。其實八方之前喺新聞處酒會問過阿松，幫BB改咗名未？佢重哈哈大笑話「使唔使咁早」，希望佢唔會否認，話八方講大話啦。
﹙圖﹚小伏到底係咪有喜，阿松幾時先肯公開證實呢？資料圖片
傳真︰2623-9278
電郵︰