美股周一晚大幅反彈，港股早段跟隨上升，但午後則回軟，似乎市場預期周二晚美股會有回吐。恒指噚日只升59點，收報9715，成交59.71億元。
公用股唔知係衰開有條路，定係大家都認為大市好快會勁升，所以沽定啲防守性股份。繼日前港燈（006）受到社會壓力加價唔成，股價跌破30元後，中煤（003）又突然話唔派紅股，搞到噚日逆市下跌2%，收報10.25元，成交達到1.27億元，反映沽盤絕對唔輕。
不過黑客另有睇法，佢話如果中煤仍然持續大升，恒發（097）私有化計劃就好難獲得通過。若恒地（012）未能成功私有恒發，恒發亦無興趣急於增持中煤。黑客重話，通常私有化計劃失敗，隻股股價會有排衰。恒發噚日收報7.35元，升1.38%。
國新集團（1215）早前宣布以每股0.10元配售新股後，股價曾炒上0.20元以上。噚日公司向聯交所申報，主席張揚減持2.28億股，估計套現數千萬元。消息一出，股價即大跌13%，收報0.182元，成交仍達3622萬元。
富麗花譜（8176）噚日急挫32.4%，收0.025元。公司近日出現重大人士變動，跟住就話想配股集資。阿虎直覺上公司可能有啲手尾要執，所以散戶在未清楚環境前，咪見大跌就撲入去撈底博反彈，否則好易中招。
自然美（157）噚日跌8.5%，收0.375元。隻股近日累積跌幅達37%，市場更傳出有炒家被斬倉，但噚日似見有買盤積極接貨，成交578萬元。Cookie話，市場傳炒家已經搵到新水喉，但自然美應該重有得調整。
阿虎