列斯喺前日場英超聯以三比○贏咗保頓，不過有睇呢場波嘅球迷都知道戰果反映唔到事實，因為列斯場波其實唔係踢得咁好，重好多時都俾保頓控制戰局㖭！
其實，淨係睇列斯呢場嘅入波球員，就知呢場係正宗「反底波」，第一球由後衞米斯射入靚波，第二球就係由傷愈復出嘅科拿混戰中射入自己喺三月以來嘅第一球；至於第三球同樣由今場踢後衞嘅韋確斯射入世界波，反而保頓就有佐卡夫射失十二碼，又有杜夫亭中楣。咁你話呢啲唔係反底係乜嘢呢？
可能列斯領隊雲拿保斯亦知道呢個原因，所以喺賽後都淨係話好開心，唔敢講隊波已經重返勝軌，而我求大俠亦奉勸各位球迷應該先忍忍手，睇多場列斯辦先落注。
國際足協噚日宣布，大洋洲喺○六年世界盃決賽周有一個參賽名額，歐洲同埋南美洲就各自冇咗半個名額得番十三同四隊。講真呀，歐洲同南美洲有好多球隊都未夠班，入到世界盃決賽周都係陪跑；反而大洋洲嘅球隊好似澳洲咁，近幾年進步神速，𠵱家國際足協有咁嘅決定，證明佢哋實力終於得到世界認同。
NBA兩支弱隊公牛同灰熊近排表現都好矚目，前者近五場波贏四場，灰熊更加近六場勝五場；公牛噚日爆大冷贏咗塞爾特人之後，有啲球員甚至揚言將目標指向季後賽，我求大俠讚同呢班後生仔為自己釐定目標，但常規賽𠵱家先打咗三分一唔夠，講季後賽早唔早咗啲呀！
NBA嘅76人球星艾華遜噚日坦言自己好想打後年嘅奧運會，但對自己能否入選美國夢幻隊嘅機會，就唔敢樂觀，佢話自己近呢幾年嘅表現都冇乜令人失望，但就成日俾人忽略，覺得好唔公平。講真，既然好多大牌球星都對奧運會避之則吉，𠵱家艾華遜開到口話恨打，我認為評選小組呢班老人家好應該考慮多啲艾華遜嘅超凡球技，而唔係佢場外……
網球女將杜姬克嘅老竇戴米嘅行徑時不時會「嚇」人一跳，佢靜咗一排之後，近日又發「謬論」，話女子網壇超過四成嘅球手係同性戀，又話如果佢自己嘅女都搞「基」，自己就會自殺咁話。大佬呀！嘢唔可以亂食，說話都唔可以亂講㗎，我求大俠睇怕戴米都係「寂寞」難耐，又想出風頭啩！