古天樂昨日到銅鑼灣，出席他有份設計的「ZeroX」眼鏡系列記者會。
對於好友羅嘉良撞車後不顧而去，以及有傳同車女子是宣萱，古天樂說：「雖然同佢（嘉良）好朋友，但係自己唔想有太多評論，唔想將件事惡化，而且我不嬲都唔信係宣萱囉！我好少見佢飲酒。」
另外，網上有傳言古天樂早前在峨嵋山拍戲時，有fans遭內地公安打，古天樂說：「事後有fans寫信話我知呢件事，可能啲工作人員同保安唔想佢哋阻住拍戲進度，所以先推佢哋。但係fans都話只係跌親，唔係好大件事。」
此外，楊千嬅的音樂特輯《當飄雪戀上聖誕樹》，昨日在銅鑼灣富豪香港酒店舉行首映禮，古天樂亦有出席。千嬅表示近日常被狗仔隊追蹤，她快要睡天橋底，她說：「住客投訴話成日有記者嚟問佢哋，有冇見男人喺我屋企出入，真係好冤枉。」