我羅拉不嬲都好鍾意睇日本啲電視廣告，雖然唔少人話佢哋冇內容，但計我話最緊要夠爆笑！近排我最欣賞米倉涼子幫SALA髮蠟拍嘅機艙急救廣告，佢一人分飾儍空姐同爛瞓乘客兩角，誇張得嚟又有諗頭！
平時我哋搭飛機遇到氣流，機艙頂部就會跌個呼吸器落嚟，等你吸兩啖氣定定驚，但喺米倉呢個廣告入面，機頂跌落嚟嘅竟然係一樽髮蠟！呢樽髮蠟有乜用？就係等喺機上面瞓到天昏地暗、個頭亂到好似「癲婆」咁嘅米倉，可以整理吓啲頭髮！佢左搽搽，右搽搽，身邊嗰位儍空姐（又係米倉飾演）重好似訓話咁不停講：「搽多啲！搽多啲！」結果所有乘客啲頭髮變得又直又「令」，靚到直情可以去參加選美。
聽講呢個廣告只係拍咗半日就收工，工作人員話因為米倉手腳夠快，空姐角色啲對白明明水蛇春咁長，但係佢背咗一陣就話OK，都咪話唔專業！