由陳妙瑛投資嘅健康美容產品「LF完美女人系列」同埋佢最新代理嘅化妝品品牌「Make」嘅旗艦專櫃，噚日喺銅鑼灣Beaute@Sogo開幕，除咗陳妙瑛在場坐鎮外，重請咗歐陽妙芝、楊怡同梁敏儀擔任嘉賓，梁敏儀着咗件露背裝，即場由化妝師為佢喺背部化妝。
陳妙瑛話對於早前「LF完美女人系列」獲選為一百個最卓越品牌之一，覺得好鼓舞，佢話：「今次洽談『Make』呢個品牌嘅代理權，本來諗住只係傾香港區嘅代理權，但係對方見我間公司嘅成績唔錯，就成個東南亞區代理權都畀咗我做，佢哋重建議我做埋代言人㖭。」陳妙瑛話今次投資咗七位數字，諗住遲啲開三十個專櫃㖭！
林曉峰（阿Lo）會喺聽日同康子妮拉埋天窗，但呢對新人竟然冇邀請好友之一嘅吳家樂去飲，噚日家樂喺電視城開工時話：「我都係睇報紙先知佢哋結婚，佢都冇請我飲，咁神秘唔知係咪有咗餡呢？不過自從阿Lo識咗康子妮之後，就好似錢嘉樂識咗李珊珊一樣，成個人定晒，我會恭喜佢哋同埋送相簿畀佢哋做禮。」
由陳曉東做男主角嘅電視劇《倩女幽魂》，套劇老闆楊登魁話本來屬意由F4嘅仔仔周渝民做主角，但係仔仔話對自己嘅演技冇信心，因為佢覺得內地市場一衰咗就好難救得番，兼且套劇要拍成四個月，仔仔都冇咁長嘅檔期，所以就推咗唔拍。呢套劇總共三十六集，每集成本要成七十萬。
楊紫瓊同鍾再思其實已經係公開嘅情侶，但每次見到記者佢哋都好鬼避忌。噚日馮仁昭就喺香港機場見到佢哋兩個由北京返港，原本佢哋並排而行，但一見到記者，鍾再思就即刻彈開，留番楊紫瓊應對傳媒，楊紫瓊話：「今次我去北京睇景，明年會開拍《女黑俠》，到時有好多武打場面。」
顧紀筠噚日喺柴灣為盈康活健康產品拍硬照廣告，佢遲啲會幫呢個牌子嘅產品拍一個電視廣告。顧紀筠話諗住出年一月至三月攞兩個月大假去玩吓，佢話自從佢媽咪過咗身後，佢對人生嘅睇法已經唔同咗，覺得唔應該成日掛住做嘢，應該抽多啲時間去享受人生。
小雪噚日出席九龍城「環球嘉年華2002/3」慈善義賣簽名會，佢話有幾個舊愛約佢聖誕節去街，佢話：「我啲喺加拿大同澳洲嘅前度男友，聖誕都會返香港過，不過佢哋唔係追我，我同分咗手嘅男朋友全部都可以做番朋友，佢哋有時會叫我幫手撲演唱會飛。」