立法會上星期辯論二十三條辯到出真火，陳主教被辱罵，議員講到大炮、機關槍都出埋，不過星期日嘅示威就非常和平。八方早前見到港大法律學院院長陳文敏，講起二十三條，佢總認為文明社會應該容納不同意見，唔應該人身攻擊。
陳院長又不厭其煩咁企喺港大同八方分析出白紙草案嘅利弊：佢話政府出白紙，唯一代價只不過係幾個月時間；但如果唔出，付出嘅代價就係政府嘅統治威信。因為社會強烈要求出白紙草案，可能有啲人未必知道二十三條講乜，但好多人明乜嘢叫白紙草案，會質疑「點解你唔肯諮詢我哋，你梗係有嘢收埋啦！」令到公眾對政府唔信任。
陳文敏又話，𠵱家諮詢文件淨係得空泛嘅原則，好多地方冇交代，政府要人支持佢，起碼都要話畀人知，支持啲乜至得㗎，當然陳文敏嘅論點對親中人士並不適用。
﹙圖﹚陳文敏話政府應該出白紙草案，令市民知道點解要支持立法。
傳真︰2623-9278
電郵︰