獲譽為「金刀梁」嘅梁智鴻醫生，自從做咗醫管局主席之後，除咗睇實醫管局之外，重好勤力睇症，每日只瞓四、五個鐘，確是十分辛苦，但仍然見佢鬼咁精神，精力充沛到真係令八方五體投地。
八方見親佢都問佢點樣改革醫管局，點樣為醫管局赤字止血，講都講到悶。噚日轉換吓話題，梁醫生同八方講咗一個發生喺十年前嘅「鬼古」。
話說喺三、四十年前，梁醫生重喺港島瑪麗醫院醫生宿舍住嘅時候，宿舍就喺殮房隔籬，喺殮房門口側邊有條樓梯可以通去宿舍，平日揸車可以轉過彎唔會經過殮房門口。有一日，佢半夜三更搭的士返宿舍，為咗貪快，就叫的士大佬喺殮房門口落車就得嘞。的士大佬好愕然咁問佢，點解喺殮房門口落車？佢就答話「我就住喺嗰度」，嚇到的士大佬錢都唔夠膽收，等佢一踏落車，就即刻飛車走人。
梁醫生講番呢件事重哈哈大笑，問佢住喺殮房隔籬驚唔驚，佢話「驚乜啫」。其實佢喺醫院都見慣大場面，梗係唔驚鬼神呢啲咁冇科學根據嘅嘢啦。
傳真︰2623-9278
電郵︰