二三線股仔爆出會計師造假帳黑幕，搞到小初心驚驚，市場傳聞事件唔止咁簡單，可能牽連好廣。
睇嚟今次股仔都唔慌有運行，小初都係暫時留意啲上市好多年，又冇乜負面消息嘅公司，咁樣會比較穩陣。
經紀陳話，連續蝕錢好多年嘅中保永興（621），今日公布中期業績，市場傳聞今年有望轉虧為盈，雖然盈利唔慌多，但都叫做有改善，唔排除股價有異動。好似聯太工業（176）中期盈利升1.8倍，但只得160萬元，股價則升39%，收0.32元。
佢重話中保永興做開建築，近年建築業環境如何，大家心中有數，能夠有錢賺，已經算係咁。公司最近又公布，在珠海投資污水處理廠，叫做分散業務，總好過守株待兔，話唔定會殺出一條血路。
不過，小初見隻股成交實在太少，雖然噚日上升6.1%，收0.104元，但成交只得10萬大元，實在驚上車容易落車難。
慕容小初