美股上周五大跌逾百點，後市似乎難以看好。噚日有歐資力沽中移動（941）及滙豐（005），似乎今年年尾基金係沽貨套現，唔係托高股價作櫥窗裝飾。
ｉ師傅話，今年基金在股票投資比重偏低，根本毋須托價粉飾，不過一啲揸咗二三線股嘅基金，由於投資主要集中在兩三隻股份身上，故有可能推高股價來粉飾基金年結業績，因此年底之前，可能有部份二三線股會表現不俗。ｉ師傅重叫阿虎要特別留意比亞迪（1211）。噚日此股逆市反彈2.76％，收市報14.90元。由於比亞迪貨源歸邊，股價有可能被推高逾15元以上年結。
港基銀行（636）噚日復牌最高升至2.65元，收報2.525元，升幅收窄至11%，成交達5898萬元。市場雖然一般估計，收購價應高逾3元，但噚日買盤依然審慎。黑客話，其實大股東阿拉伯銀行想減持好耐，不過就一直未有行動，據悉至今仍未有買家出價，只不過係阿銀同光控（165）表態想出售港基股權，此外阿銀要確定光控嘅意向後，才搵潛在買家。若此事屬實，遲啲件事再冇下文，港基可能跌回2元水平。
賽迪顧問（8235）似乎開始失控，上市3日以來，股價均潛水收市，噚日連維持秩序嘅炒家盤都冇埋，股價再挫11.4%，收報0.195元。Cookie話，據聞此股上市頗為勉強，幕後亦冇特別背景，股民對此股亦唔太熟悉，圍內人早知好難炒得起。不過，若將上市時間延後，則會浪費更多錢，所以幕後唔理三七二十一上咗至算，等上市之後至搵機會炒高。
阿虎