還有一個星期就到聖誕節，除咗大人會購買禮物送畀自己好朋友外，送畀小朋友亦不能缺少，而玩具自然是最佳禮物，個個小朋友收到必定開心到飛起。林林總總的兒童玩具，究竟小朋友喜歡收到乜嘢禮物，就等小記替大家追訪，而且更替大家挑選多份啱小朋友品味嘅益智玩具。
記者：梁煒健 攝影：林栢鈞
ImageKids：Tiger、CoCo
男女都啱玩
如果你屋企有兩個細路，買禮物又驚佢哋爭嘢玩，相信呢套由TOMY廠出品嘅趣味跑步機就最啱，因為呢個遊戲要兩個人一齊玩先至得。點樣玩法？首先放入兩枚C型大電池於主機中央，再把兩個震動控制器分別綁於腳上，兩個參賽者要用最快速度跑動，快速震動時跑道上男女健兒就會跑動，最快到終點者為冠軍。
「LeapFrog」出品的LeapPad，內置電腦，可對應該本圖書。只要小朋友用其特殊的閱讀筆，跟着圖書上的文字一行一行閱讀，內置的電腦即時對應，讀出該文章的正確英文發音。除可教小朋友串字或發音外，亦有19種如自然、科學、生物、音樂等內頁替換，每種$149.9。
送畀仔仔
「FastLane」出品，這部以比例1:18製成的MiniCooper，車身長至24吋。由於要求像真，車內裝飾照足真車仿做，而按了遙控器上的特殊按鈕，車頭、車尾均會着燈，更可發出多種響聲，車門及車頭蓋亦可隨意打開，非一般豪華級別的遙控車能做到。這架車以9.6vNi-Cd充電池啟動，由於體積龐大，所以走動性能比細小的較慢，適合訓練6歲以上小孩手腦並用的能力。但售價要$1,000，冇discount都幾重鎚。
美國「SpinMasterToys」出產的遙控飛天神鷹飛機，比例為1:24，按比例飛行時速約有400哩，十分之快。在附送的充電座充電3分鐘（以6枚中電作充電），便可玩足5分鐘，而且另附CDRom以電腦程序操作升空，充電後把飛機拋出，飛機便靠兩邊螺旋槳自動攀升，你只需以遙控器控制左右及攀升，想降落？一按即下。
總之係超人Fans，不單止是小朋友，就連大人都會喜歡呢套《新世紀超人傳說》嘅膠公仔；全套28個超人，每個約高4吋。由於有齊所有歷代超人（其他超人形態不計算），包括超人吉田、Ace、太郎、佐菲、迪加、帝拿及佳亞等，就連今年誕生嘅超人高斯都有。雖然手腳唔郁得，但由於造型極正，28個超人加埋都係$448，即$16一個就知抵買；這套Boxset自然係小朋友嘅至愛，收到做聖誕禮物必定Happy，若果唔係，亦可以每個月送兩個超人，小朋友一樣會OK。
送畀囡囡
呢個約有7吋高的聖誕維尼，握其右手就會發播出悅耳的聖誕歌曲，同時其左手手持的街燈亦相繼亮起，頗為趣致的小孩恩物。
被美國權威雜誌《People'sChoice》選為ToyoftheYear嘅BRATZ着衫figure，喺美國非常大熱，相信在明年亦在香港大行其道；每款約高10吋，而全套figure共有5款女主角。每個figure均有兩套衫、兩條褲及兩對皮鞋及日常用品配件附送，十分有型有款；論吸引，要是牛仔褸按掣後會閃燈，夠晒特別。另外，這5款女人型公仔，另有個別不同的配件發售，如時尚便服或鬆糕鞋等，每套售$59.9。
店舖資料
玩具反斗城
查詢電話：29916222
營業時間：上午10:00時至晚上11:00
超人玩具
地址：旺角西洋菜街1N兆萬中心2樓222舖
電話：23662688
營業時間：下午1:00時至晚上10:00