陳奕迅前晚在《2002年勁歌金曲第四季季選》中，因為抱恙演唱，結果失準走音，他表示不介意，因他堅持無論甚麼情況下，都盡量唱現場。可是許志安卻大唱反調，認為宣傳可以咪嘴。
陳奕迅（Eason）、陳文媛（BoBo）、許志安和梁詠琪（GiGi）等，前晚在無綫電視城出席《2002年勁歌金曲第四季季選》。Eason因為抱恙，在現場演繹得獎歌曲《人來人往》時，竟失準走音，但Eason處變不驚，繼續演出。
問Eason在演出時為何會走音？他說：「我今晚（即前晚）病呀，我懷疑自己鼻竇炎。我覺得自己點都要唱現場，因為攞得獎，歌迷都係想聽我唱歌，如果咪嘴，不如攞隻CD播！我唔係錄音機，少少瑕疵實有，但走音都可以兜得番。」
當Eason接受訪問期間，電視正直播李克勤演唱，Eason大讚對方歌藝很好，他說：「佢把聲幾時都咁好，可能生活健康，有運動，我冇運動就易病。近排成日傳我同克勤不和，傳傳吓我哋都熟咗，我覺得大家係良性競爭。」
Eason堅持表演要唱現場，但身體不適的安仔前晚卻咪嘴，他說：「公開場合咪嘴係有原因，始終唱得最好嘅版本收錄喺CD，非必要唔一定唱現場，我宣傳隻歌都係想將最好聽嘅版本唱出嚟。」對於Eason失準走音，安仔說：「好小事，佢始終係人，唔係機器，Eason嘅歌藝冇人會懷疑，佢唱得唔好或走音，可能係人為因素或者有痰。」
安仔昨日在中環被委任為渣打馬拉松大使，對於前晚出席《勁歌》季選，無綫欲安排他代鄭秀文（Sammi）領獎，但結果安仔沒有為她攞獎，安仔對此說：「我有睇番錄影，都冇講過我幫佢代領！」
此外，Eason日前曾公開指梁詠琪的男友鄭伊健不太喜歡唱歌，對此梁詠琪說：「我相信Eason冇惡意，佢鍾意講笑啫。」
採訪：王連連、李珮洳
攝影：陳慧安