在香港想過一個白色聖誕，其實不難，例如可以到海洋公園，因為他們已為大家準備了特備節目「聖誕全城hohoho」，有拉斯維加斯式溜冰表演、真雪聖誕樂園、攤位遊戲及聖誕節美食等，讓大人細路玩個痛快、影相影個飽！
記者：梁珮瑜
攝影：楊錦文
地點：海洋公園海洋綜藝廣場
時間：由即日起至12月20日上午10時至下午6時；12月21日至03年1月1日上午10時至晚上8時；03年1月2日至5日上午10時至下午6時
收費：海洋公園入場費成人$180，小童(3-11歲)$90
威威獅令冰上騷：免費入場
歡天雪地入場費：每位$10
查詢：25520291
歡天雪地場館以一部製冷機製造真雪，布置出一個白色聖誕。除了有聖誕老人同你影相，又有大型聖誕樹、各款聖誕布置、奇幻燈光及真雪地帶等。
今次請來陳氏部隊，試玩是次活動兼畀評語，他們上年聖誕節都有到海洋公園玩，且看今年又如何！
仔仔在真雪場玩到唔捨得走，唔嚟多次點夠喉！不過場館室溫只有8度左右，進場記得帶多件衫，媽咪更提醒：「如果細路仔玩雪就要帶定對手套。」雖然，這裏的真雪地帶面積不太大，但4呎以下的小朋友可以入內玩真雪，又可以利用會場提供的小工具砌雪人或打雪戰，梓浚覺得新奇又好玩，鏟雪鏟得好開心，成為佢口中的最好玩項目。
爹哋評語：「$10好抵玩，啱一家大細，我哋會嚟多次！」
場地一角有攤位遊戲及拍照服務助興，至於拋波等遊戲雖然較為普通，不過大大個毛公仔做獎品應該有點吸引力，但梓浚身為男生就無被這角落吸引。
仔仔評語：「興趣不大。」
場內設有美食檔，供應熟食、爆榖及飲品，玩到餓可以即醫肚。一家食過都話味道唔錯，栗子配生炒臘味糯米飯$25，賣相及味道都不錯。
爹哋評語：「幾好食，價錢都OK。」
那裏還有一個特大的巨型郵筒，讓小朋友把願望及祝福寫在由海洋公園派發的明信片上，放入郵筒後，那裏的職員便會把所有卡寄到芬蘭聖誕村的聖誕老人處。
模型火車圍繞鐵路行車，穿過雪山山洞時小朋友就最興奮，睇極唔厭。
籌備了一年的《威威獅令冰上騷》是全港首個戶外溜冰騷，是拉斯維加斯式的大型溜冰表演。海洋公園的吉祥物威威獅令會聯同13個來自加拿大、美國及東歐等地的溜冰好手演出四幕歌舞劇，大會還邀請了著名百老滙歌劇大師BillyChapel排舞，早前威威也到拉斯維加斯訓練及綵排呢。