最近我求大俠睇波，好似淨係睇曼聯嘅時候比較過癮啲，其他強隊都冇乜霸氣，相信唔少鍾意捧強隊嘅波友都會有同感！
計埋幾日前大勝韋斯咸在內，曼聯最近已經響各項賽事取得七連勝，甚至乎佢哋嘅亞洲盤路亦同樣連贏七場，呢首「長勝歌」真係唱不完咁款。可能同佢哋響臨近聖誕新年都冇假放，所以𠵱架衝行咗嘅火車好似停唔到咁，場場都搏盡有關。相比起拜仁慕尼黑同埋皇家馬德里等間中派啲𡃁仔上陣行行企企，好似等歇冬；難為捧佢哋場嘅波友，愈睇愈眼冤。
投資專家話「聖誕鐘，買滙豐」穩賺，波友們𠵱個時候可能想「歐洲波，買紅魔」都一樣得啫！
前日意甲聯有祖雲達斯對拉素大戰，我求大俠本來有好大期望，點知唔睇猶可，一睇把幾火，嗰場波煙霧瀰漫，根本睇唔到兩隊踢成點。我初時以為係球迷放煙花，一陣就會散去，點知原來係大霧，重話有關方面原先諗過將場波改期。唉！如果意大利嗰邊家陣嘅天氣係咁，我寧願佢哋早啲歇冬好過，免得球迷嘥心機捱眼瞓。
「神奇小馬尾」巴治奧雖然三十有五，不過喺前日布雷西亞贏佩魯賈三比一嘅聯賽中就射入一球，攞到佢喺意大利聯賽第二百球，同埋職業生涯嘅第三百球；連星期三場皇馬對世界明星隊嘅表演賽，都拿拿臨搵巴治奧頂替受傷嘅韋利，你話佢嘅江湖地位幾高呢！
日本國腳小野伸二，日前喺荷蘭甲組聯賽飛燕諾狂數艾克馬亞六比一嗰場，個人就入咗兩球，總算為一眾效力歐洲聯賽嘅日本國腳爭番口氣，因為除咗中村俊輔之外，其他留洋超過一季嘅隊友都開始現疲態。其實，亞洲球員打歐洲聯賽長途戰，體能始終係最蝕底，我求大俠惟有講句：頂硬上啦！
魔術老將賀維士格蘭最近突然被踢走，原來背後有段古。話說麥基迪指格蘭向ESPN篤佢背脊，話佢淨係識進攻，完全唔打防守。格蘭大喊冤枉，直指教練李維士先至係幕後黑手。李維士反咬格蘭造謠生事，一怒之下將佢逐出魔術。其實麥基迪同李維士有心病，今次格蘭只不過係替死鬼，唔怪得魔術呢排愈打愈沉，睇嚟啲消息係堅料喎！