荷李活萬人迷里安納度狄卡比奧（LeonardoDiCaprio）不但迷倒一般fans，本月初他訪日時，連菅野美穗及藤原紀香亦先後搶着訪問他。
菅野過去曾表示，唯一欣賞的男演員便是里安納度，故平日多以casual打扮示人的她，代表雜誌《non.no》訪問里安納度時，亦特意穿起ChristianDior連身裙。她大讚里安納度變得異常有男人味，並怕醜地說：「以前我覺得佢好瘦，𠵱家見佢個胸好似一塊厚板咁，可能係肥咗啲，不過我想佢keep住咁嘅身材喎！」
菅野更大膽追問到里安納度拍床上戲時的感覺，她說：「你喺電影《紐約風雲》同金美侖戴雅絲（CameronDiaz）場床戲激到好似嚟真咁喎！」而里安納度亦大方回答說：「咁劇本需要我好似隻獅子咁狂吖嘛，我哋成身都打到傷晒！」菅野即追問道：「咁你係咪鍾意拍溫馨嘅床戲多啲？」狄卡比奧笑答：「咁要睇吓同邊個拍啦！」
訪問後，菅野說：「本來我都驚會後悔見過佢，破壞晒佢喺我心目中嘅完美形象，但原來佢真係一個由任何角度睇都咁有魅力嘅人！」菅野的小fans心態，可謂完全表露無遺。