早前小初提過，上海幫下一個目標係國潤控股（175），之後一直冇聲氣，但噚日隻股開始有異動，經紀陳叫小初不妨留意吓。
國潤噚日升6.6%，收0.405元，成交增加至357萬元，雖然金額唔算特別多，但平日少有咁熱鬧場面，不過買盤一睇就知係自己人互相傳球。
經紀陳話，身為上海幫嘅國潤，據講可能同北京幫合作，合作形式會係發新股畀對方，一來收購新項目，二來引入策略性投資者。
上海幫上次買四海旅遊炒賣殼，用隻股收購一批上海地產項目後，手上股權沽得七七八八，隻殼搖身一變成為上海世紀（755），手法異常乾淨利落。今次食過返尋味，想再下一城，真係完全唔出奇。
不過，國潤成交仍然未夠勁，小初最怕買咗走唔到，加上年尾流流，點知人哋係玩mark價定真係有料到，都係睇多一陣先算。
慕容小初