恒指再跌71點，滙豐（005）成為拖低指數嘅大主角，收86.75元，跌1.50元。滙豐窩輪唔少，有Put有Call，Put輪上升，Call輪唔掂，又因為槓桿唔細，所以變動幅度亦比較大。
滙豐Put輪9445做咗是日輪王，收12.3仙，升26.8%，有9球幾易手。隻輪下月底夠鐘，溢價5.7%，槓桿率70.5倍。淨係睇槓桿率，好爆炸，用1蚊控制70.5蚊嘅嘢，不過睇埋行使價83元，即係滙豐喺5個禮拜內跌唔夠3.75元以上（現價86.75元），則隻輪就會變成冇得剩。另1件滙豐Put輪9431，昨日彈升26%，做龍虎榜阿2，明年2月初夠鐘，壽命稍長，現價9.7仙，溢價7.7%，槓桿率89.4倍。行使價81元，正股若然跌唔夠5.75元，隻輪又係唔值錢。
死火輪榜上，滙豐Call輪9395同9415，分別散32.2%同29.1%。9395重有兩個幾禮拜夠鐘，行使價88.5元；9415壽命長過9395少少，行使價95元。滙豐要升1.75元，9395至唔使作廢，滙豐要升8.25元，9415至唔使作廢。
假設滙豐未來幾個禮拜升幅或跌幅都係唔大，則昨日龍虎榜與死火榜上嘅滙豐Call輪同Put輪，將全部香晒。
章盛