前兩日東華籌款，全晚籌得最多善款嘅，竟然係表演拉小提琴嘅民政事務局局長何志平，為大會增加五百萬進帳，恨得班民主派牙癢癢。八方知道何局長食過翻尋味，嚟緊聖誕節會馬不停蹄到處表演小提琴，盡顯親民一面。你話有一技之長幾重要，局長得閒表演吓小提琴，民望想升一兩個百分點都易啲啦。
其中一個活動，係下個星期一晚喺文化中心舉行嘅「聖誕老人愛心大行動」，何志平會同魯平媳婦姚珏合奏，拉巴赫《D小調雙小提琴協奏曲》。另外當晚著名男高音莫華倫唱《聖母頌》時，何局長亦會為佢伴奏。
另一方面，醫學會於聖誕期間，組織咗一班醫生為住院病人表演，將普天同慶嘅歡樂氣氛帶到病房，聽聞何局長以往都有參加，雖然今年佢不再係醫生，但都會繼續為病人表演，表演啲乜？當然又係拿手嘅小提琴啦，唔通表演講解賭波規範化嘅好處咩！
講到佢同姚珏合作演出，八方問姚小姐，佢兩個大忙人需要練習幾耐。姚珏話噚日先同何局長見面傾過，發覺佢對呢支曲好熟，今個星期二、四、六晚都約好去演藝學院練習，希望下星期一晚有一次精采嘅演出。
傳真︰2623-9278
電郵︰