廠家L在東莞設廠多年，生意做得幾好，左丁山問佢：「你既然曾經簽字挺董，又支持基本法二十三條立法，究竟是否真心支持香港？」廠家L話：「初到東莞，人人以香港為偶像，我自認香港人，樣樣高人一等。呢兩三年，我就認係東莞人，東莞發展一日千里，東莞佬講起香港，至多係客氣講一句：香港係學習對象，其實已經有啲睇香港唔起，佢哋亦唔明點解呢幾年香港會衰成咁。」
廠家L喺八七年因股市停市四日，幾乎破產，剩番一注資本，東山再起。𠵱家珠三角出口訂單接唔切，年年增長，佢啲貨運去美國，多數經鹽田出口，貨櫃費用比香港平一半，因此唔明白將來香港點樣可以成為物流中心。佢賺賺埋埋，理應積蓄龐大，會唔會喺香港買番幾間豪宅自住、收租呢？廠家L話：「你儍嘅咩，我喺香港只有六十五個員工，貨物直接在內地出口，香港公司做到年年冇錢賺，內地廠賺錢，我就袋埋唔使交香港稅，如果喺香港買山頂豪宅，稅局一定搵我解釋資金來源，你話幾咁麻煩？住開一間兩千呎舊樓，好舒服啫，買新樓做乜？此外，我睇唔到香港嘅將來，亦睇唔到特首有乜好計，買樓收租喎？好容易揩嘢啫。」廠家L喺九七時賣咗幾層樓，逃過一劫，加埋八七年嘅教訓，所以現在對買樓買股票都非常小心，賺埋啲錢就放喺外國銀行，唔怪得香港外貿數字強勁，但我哋似乎冇乜好處！