拍完所有演員的戲份後，最後一天要拍動物。影圈名言有云：「小孩與狗，馬與教頭」，全部都好難拍，惟有用時間、用菲林去捕捉，更多的時候是博運氣。
首先要拍的是兔仔逃跑，但三隻胖胖的小灰兔，相信已是養得好食難跳，放在草地上郁都唔願郁，眼仔睩睩地四圍望搵着數。突然，其中一隻鹹濕兔爬上另一隻背上，大幹特幹起來，頻密的腰腿動作既畢，還要趕到被幹兔的面前來一個顏射。攝製隊目瞪口呆之際，鹹濕兔突然又爬上另一隻兔背上來個雙響炮，攝影師笑到手都震晒，久聞兔仔生殖能力旺盛，今次聞名不如見面，菲林捕捉了此珍貴鏡頭，但如放在賀歲片當中播放，不知會否因此被判三級？
接着要拍一群驚鳥飛出大樹，放出約八十隻雀仔，但由於亂飛關係，鏡頭未能準確捕捉。雀仔們逃出生天，不約而同棲息在一棵小樹上，大家於是躡手躡足移攝影機就磡，準備開動攝影機後，一腳伸埋棵樹，重新捕捉驚鳥亂飛鏡頭。結果是亂腳踢樹，雀仔睬你都儍，唔飛不特止，重唱歌㖭。道具手足不知從哪裏借來一串炮仗，樹底放炮仗，人都走啦，何況係雀？點知結局又係吹到「啤」一聲，雀仔們當你過年放炮仗，一啲都唔驚，重想派利是㖭。
又係嗰句，拍戲嘅過程有時好痛苦，但係事後諗番起，確係真係好好笑。