十一歲的傑仔今年五月證實罹患罕見的血癌，近月，其體內的白血球持續下降，急需進行骨髓移植，否則隨時有性命危險。刻下，傑仔已在新加坡覓得三個初步脗合的骨髓，惟有關的樣本化驗及運費合共十萬零五千元，生活捉襟見肘的傑母阿菁，無力支付該筆龐大的醫療費用，急待善長慷慨捐助。
「𠵱家傑仔隔幾日就會發燒一次，每次食嘢之後條腸就會好痛，成日要入院睇醫生，以前佢好活潑好動，好鍾意打籃球同埋游水，但自從患咗呢個病之後，成個人變得好內向，唔肯出街。佢個病唯一嘅出路就係骨髓移植，我連幾千蚊嘅驗血費都拎唔到出嚟，更何況之後搵到脗合骨髓，運送費加埋手術費要成十幾萬，真係好希望有人幫到我哋。」經常為愛兒傑仔的病況及醫療費用奔波、臉容疲憊的阿菁顯得憂心忡忡。
四十一歲的阿菁曾從事地產行業，與丈夫結婚多年，育有兩名孩子，除了傑仔之外，尚有一名十九歲待業的兒子。自次子出世後，她便辭退工作留在家中相夫教子，家庭的擔子落在其夫身上，生活尚算安穩。六年前，她因與丈夫不和，最後鬧至離婚，現獨力照顧兩名兒子，依靠七千多元的綜援金過活，經濟緊絀。
「醫生話傑仔血色素唔夠，所以好容易攰，連行路都冇乜力，同佢去睇醫生都要靠我孭住，出入醫院更加要搭的士，淨係車費開支都好大，𠵱家最擔心籌唔到錢，佢就冇得做手術，呢排見佢隔幾晚就發燒同埋肚痛，好辛苦，搞到我自己嘅心情都好差，衷心希望大家盡量幫吓佢。」阿菁慨歎說。
就讀小學五年級的傑仔，今年五月因肚痛前往求診及驗血，經醫生證實患了慢性骨髓發育不良症，屬血癌的一種，必須進行骨髓移植。受病患影響，傑仔除了不能返學之外，其體重更由二十四公斤跌至十九公斤，記者所見，穿上厚厚的衣服亦難掩其瘦弱的身形，依在媽媽身旁的傑仔羞澀地說出其聖誕願望：「我希望快啲好番、快高長大！」
傑仔的主診醫生、港大兒科學系副教授陳志峰說：「骨髓發育不良嘅癌症喺香港係好罕見，由於體內製造出唔正常嘅白血球，做化療根本唔可以清除呢啲癌細胞，一定要靠骨髓移植，𠵱家傑仔嘅白血球愈嚟愈低，好容易受到細菌感染，生命隨時受到威脅，暫時惟有靠食維他命藥控制病情。」
貧困的阿菁三口，須節衣縮食過活，實無力支付傑仔一筆約十萬零五千元的醫療費用，急待善長伸出援手。
捐款編號：C0775
暖流熱線
電話：29908688
傳真：23702192
電郵：
網址：