日本藝人推出副產品，一向係佢哋收入嘅重要來源，所以就算佢哋開個唱使成過千萬製作費，單係賣一大堆演唱會相關產品已經賺番晒！咁佢哋近期興出啲乜？咪就係成個人咁大嘅product囉！
呢啲所謂「等身大」產品，其實不嬲都有，不過近期愈出愈多新花款，最basic嘅當然係「等身大」毛巾啦，特別係啲水着女星，等男fans有攬住偶像嘅感覺嘛！最近佢哋重推出「等身大」攬枕，好似玉女菊川怜、YellowCab嘅小池榮子、川村亞紀、佐藤江梨子同根本春美等今個月都有新貨面世。不過男fans唔好開心住，毛巾盛惠七百蚊港紙，而攬枕就更加要八百三十蚊（未連稅），你都咪話佢哋唔「身嬌肉貴」。
至於一般少女偶像就最鍾意推出成個人咁大嘅海報，小妹妹松浦亞彌今個月啱啱出咗新款poster，個甫士就悶啲，但勝在笑容夠親切，價錢都唔算貴，大約二百三十蚊港紙啦！