香港人一向貪新忘舊，揀手機最愛追款，每逢出新機，就有人唔理價錢、唔理機款，幾貴都要換部玩玩。至於深圳人選擇手機又會考慮啲乜？一於喺東門作一次街頭直擊。結果發現深圳人買機嘅原則，最緊要機款夠型夠靚，好似以型見稱的MotorolaV70，就成為深圳街頭熱門手機之一。香港嘅朋友若果想返深圳買手機的話，我勸大家唔使諗啦，因為每部機都比香港貴幾百蚊，好多內地人反而託香港嘅朋友買上去𠻹！
記者：歐嘉荃
攝影：小王子
現時市價 3,300
Joyce 時裝店老闆
每月花費：約?500
買入價：$3,000
「部機係男朋友喺香港買畀我，主要貪佢靚仔，不過同我以前用開嗰部Nokia8310比較，呢部機就一啲都唔好用，好似飛線，以前部機一㩒掣就可以即刻飛到線，𠵱家呢部機要等好耐先得。雖然部機唔好用，但我都無諗過換機，要換的話，機款都係我考慮嘅首要條件。」
琪琪 時裝店老闆
每月花費：約?500
買入價：?3,500
「我覺得摩托羅拉的機幾好用，呢部機本身個款都好靚，黑色的屏幕好有型，我最鍾意都係佢個電話蓋可以好似風車咁轉，型得嚟又特別。𠵱家我又心郁郁想換部PanasonicGD55，貪佢部機夠細部，啱女仔用。」
張先生 模特兒
每月花費：約?1,000
買入價：?5,000
「影手提電話？我有兩部電話喎，你影邊部呀？兩部有乜分別，Motorola用咗半年，覺得機款靚功能多，不過每月要用成?500電話費，非常昂貴，所以我喺兩個星期前出咗部市話通。市話通其實同普通手機無乜分別，不過收費平好多，一個月講1500分鐘都係?200左右，不過就唔可以打長途電話，而且有時訊號唔係太好，一入到商場就收得唔好，所以都唔可以依靠晒部市話通。」
現時市價：約?1,200
慧英 售貨員
每月花費：約?400
買入價：約?1,200
「呢部電話算係平靚正，千幾蚊就有部三和弦機，夠晒抵用！用落覺得佢幾好用，佢嘅圖文顯示夠晒Cutie，不過我最鍾意都係佢嘅中文輸入法夠晒簡單易用，因為我好鍾意發訊息，若果輸入法複雜就唔係咁方便。」
現時市價：約?1,500
阿燕 家庭主婦
每月花費：約?300
買入價：約?1,700
「我一直用開國產機，雖然好多人都嫌佢個款老土，不過我覺得國產機幾好用，聲響又夠大，接收能力好，即使喺地庫嘅商場都一樣收到。另外，我覺得佢啲按掣夠晒大又易按，非常方便。雖然部機有啲舊，但我無諗住換機喎！」
現時市價：?2,300
阿Ling DiscoDancer
每月花費：約?1,000
買入價：約?3,000
「呢部電話係男朋友送嘅，我覺得呢部機好好用，因為我每次發脾氣都會亂擲嘢，呢部機就俾我擲極都唔爛，擲到散咗，將啲蓋安番埋一齊又用得，聲都唔會沙，真係好襟用。」
趙太 家庭主婦
每月花費：約?1,000
買入價：約?3,500
「呢部機一推出就即刻去買，嗰時要成三千幾蚊，都幾貴㗎！我一向用開諾基亞的手電，完全啱晒我心水。若果換機的話我會揀彩屏（即彩芒），可能會換7210，不過一定都係換番諾基亞，用開有感情嘛！」
現時市價：約?1,800
冬冬 侍應生
每月花費：約?500
買入價：約?4,000
「我揀手機至緊要款靚，好似呢部EricssonT66，雖然我覺得部機唔係太好用，不過我就鍾意佢個機款，貪佢細部又夠輕，拎住講電話都唔會手攰。呢部機都壞壞哋，我都諗住換過部彩屏機，換邊部就未知，睇吓邊部機款靚我就換邊部。」